MUKAH: Gabungan Parti Sarawak (GPS) patut menang besai dalam Pengawa Bepilih Besai (PRU) baka maya Pengawa Bepilih Nengeri (PRN) sebedau tu.
Menteri Dagang Temuai, Industri Kreatif enggau Mandangka Seni Dato Sri Abdul Karim Rahman Hamzah madah, parti nya ulih menang ba semua kerusi chalun nya.
“Kitai patut meri sukung ngagai semua chalun enda ngira sapa sida asal mih ngarika GPS,” ku iya lebuh Pengerami Bejadi 'Penangguhan Pesta Daro' 2022 ti bepalan ba Tapak Pesta, Bandar Baru Daro kemari.
Nitih ku iya, GPS patut dipeda nyadi sebuah parti gempung ti tegap ke ari berapa gempung parti ti bepelasarka peranak di nengeri tu.
Nya mega parti asal Sarawak ti endang negika hak peranak di nengeri tu.
Pia mega, kenyau ari ketuai ti suba, pemerat sida enda kala lari ari bepelasarka aspirasyen rayat.
Taja pia, semua pengawa nya begunaka kerejasama enggau gerempung ti meruan ari sukung rayat.
Nya alai, iya deka meda sukung ti enda bebagi rayat ke diberi ngagai chalun tauka ketuai ti bepelasarka pengeransing ti dipadahka nya.
Bekaul ngatur Pesta Daro, tu iya nya siti ari program ti ulih dipadahka mujur.
Pia mega, pemisi perengkaguna jalai alun tebing pantai enggau jematan besai ti deka tembu berapa taun agi deka nyungkak agi pengerami nya nyadi tebilang.
Ari sukut empas ekonomi, nya mega deka mantu dalam mayuh aspek kelebih agi ngagai industri mit enggau tengan pemesai sereta mega pedagang di menua tu empu.
Penyelai main asal sereta pesaka mega patut dibantaika dikena ngelakuka ngagai temuai menua luar sereta domestik.
Pesta Daro 2022 tu berengkah kena 5 Ogos nyin tadi lalu deka abis kena 14 Ogos 2022.
Sama bisi datai Kaban Kunsil Nengeri (ADUN) Dari Safiee Ahmad, ADUN Balingian Abdul Yakub Arbi, ADUN Tellian Royston Valentine, Kaban Parlimen Igan Ahmad Johnie Zawawi enggau temuai dipebasa ke bukai.