Anda di sini

SJK Chung Hua No. 1 keterubah di Kuching bisi Program Pelajar Khas Integresyen

Advertisement
Jonathan (kanan) ngelaluka penatai fatimah ngagai Dewan SJK Chung Hua No.1 bejadi Kelas Program Pelajar Khas Integresyen kemari.- Gambar Muhammad Rais Sanusi
Jonathan (kanan) ngelaluka penatai fatimah ngagai Dewan SJK Chung Hua No.1 bejadi Kelas Program Pelajar Khas Integresyen kemari.- Gambar Muhammad Rais Sanusi

KUCHING: Sekolah Jenis Kebangsaan (SJK) Chuang Hua No.1 nyadi SJK keterubah di mengeri besai Kuching bisi nyendiaka Program Pelajar Khas Integresyen.

Menteri Pemansang Orang Indu, Nembiak Mit enggau Pengelantang Pendiau Raban Bansa Sarawak Dato Sri Fatimah Abdullah ngarapka deka mayuh agi sekula ke lebih agi SJK di nengeri tu ulih nyendiaka akses pelajar ngagai nembiak nyelai pendiau, laban integrasi tu deka meri pemanah tauka penguntung ngagai nembiak nyelai pendiau enggau nembiak biasa.

Ku iya, nembiak nyelai pendiau lebuh diintegrasi enggau nembiak biasa sida deka ulih jampat belajar dibandingka enti diengkah ba palan ke diri, sereta nembiak biasa mega deka ngasai tauka ngembuan ulah ti bisi pengibuh ke orang bukai setipak enggau juluk Sarawak deka nyadi negeri maju 2030.

"Kitai chukup andal ati laban SJK Chung Hua No.1 udah ngepunka tu (Program Pelajar Khas Integresyen ba sekula SJK).

"Aku ngasaika kitai begunaka mayuh agi (sekula nyendiaka Program Pelajar Khas Integresyen) laban enti kitai tumu agi  nyendiaka akses pelajar ngagai nembiak sekalika sida nembiak biasa tauka nyelai pendiau nya deka meri pemanah nya ti pemadu beguna.

"Kitai ngarapka ulih meda mayuh ari pra-sekula nyendiaka akses ngagai Program Pelajar Khas Integresyen di Sarawak," ku iya lebuh bejaku ba pengerami bejadi rasmi Kelas Program Pelajar Khas Integresyen ke diatur ba Dewan SJK Chung Hua No.1 ditu, kemari.

Bejaku baru Fatimah madah bepelasarka sumber Opis Pelajar Negeri Sarawak (JPNS) penyampau sekolah kebangsaan (SK) enggau sekolah menengah kebangsaan (SMK) Sarawak ke bisi nyendiaka Program Pendidikan Khas Intagrasi di Sarawak iya nya renggat Pra-Sekula bisi 14 buah sekula ti mungkur 15 kelas; Sekula Primary bisi 136 sekula ti mungkur 414 kelas enggau sekula sekondari bisi 61 buah sekula ti mungkur 253 kelas.

Lalu ba renggat SJK Cina iya nya renggat Pra-sekula bisi sebuah sekula ti mungkur siti kelas ke nyendiaka Program Pelajar Khas Integresyen, enggau sekula primary bisi 17 buah sekula ke mungkur 51 kelas.

"Reti iya ba SJKC penyampau semua sekula ke bisi nyendiaka Program Pelajar Khas Integresyen bisi 18 buah ke nyengkaum sekula tu.

"Baka ti dipadahka Rodger Chan Siong Boh (Chairman Pengatur Pengerami Bejadi Rasmi Kelas Pendidikan Khas Integrasi) enggau Datuk Jonathan Chai Voon Tok (Chairman Jawatankuasa Pengurusan Sekolah Rendah Chung Hua No.1 -6 Kuching ) bekaul enggau peminta guna endang agi mayuh ti begunaka akses ngagai Pendidikan Khas Integrasi.

"Sereta aku pechaya enggau penatai Direktor JPNS (Datuk Dr Azhar Ahmad) tu kebendar ngayanka iya nyukung program kitai, lalu ari sukung iya tu kitai deka ulih meda lebih mayuh agi sekula ti nyendika Program Pelajar Khas Integresyen tu ditumbuhka, ngambika (nembiak nyelai pendiau) ulih akses ngagai pelajar," ku iya.

Dulu ari nya, Rodger dalam jaku pengelalu iya beterima kasih ngagai JPNS lebih agi direktor iya ke ulih lengkas mantu enggau Datuk Jonathan ke meri sukung enggau semangat ti ngujungka numbuhka kelas tu ulih nyadi nyata.

"Ari sukung enggau peransang nya tu nyadika SJK Chung Hua No.1 (CHPS1) nyadi sekula SJK keterubah ba mengeri besai Kuching ngatur Program Pelajar Khas Integresyen.

"Kami minta dua kelas tambah ba taun baru dalam program khas tu sereta kami ngarapka Datuk Azhar ulih mantu kami ngemendarka peminta nya," ku iya.
 

  • oleh
  • Advertisement