KUCHING: SABERKAS Saratok Uptown iya nya program pasar malam ke diatu lebih dikelala enggau nama 'uptown' ditumbuh kena nyungkakka ekonomi peranak Saratok lebih agi raban orang dagang ti nerima empas enda manah ketegal pandemik COVID-19.
Chairman Pertubuhan Belia Kebangsaan Bersatu Sarawak (SABERKAS) Pampang Kalaka Abadi Hussein madahka pasar malam nya ti ngena konsep pasar tauka bazaar nya objektif iya mega dikena ngerembaika dagang peranak menua tu awakka lebih maju sereta ulih besemekih.
Objektif uptown tauka pasar malam nya mega kena mantu ngurangka pemayauh orang nadai kereja di Saratok lebih agi raban belia sereta dikena meransang raban nembiak ngereja aktiviti ke nguntung seraya nyeliahka sida ari ngereja pengawa ke enda menyana.
"Sambut tauka sukung ke diberi ngagai Uptown tauka pasar malam tu chukup meri peransang.
"Jemah ila, kitai ngarapka orang dagang ulih terus tan sereta tegap runding bejalaika dagang sida iya sereta ngarapka orang mayuh datai sereta meri sukung ngagai penumbuh uptown tu.
"Kitai ngarapka ulih nambahka agi servis ke diberi ngagai orang dagang enggau orang ke datai bebeli barang awakka uptown tu nyadi palan peranak Saratok bejalaika aktiviti malam maya ujung minggu begulai enggau diri sebilik," ku iya seraya madahka objektif numbuhka Saratok Uptown mega dikena ngerembaika pengelandik bala nembiak Saratok.
Saratok Uptown ti bepalan ba Arena Bola Tampar SABERKAS tu udah berengkah beoperasyen kena 25 Februari 2022 , iya nya dibuka tiam malam hari Lima ngagai Hari Minggu berengkah pukul 4 lemai ngagai 11 malam.
Saratok Uptown tu dibuka tauka ditumbuhka serebak enggau aktiviti bukai iya nya pekit main bol SABERKAS pampang Kalaka piala YB Datuk Ali Biju Tertutup P205 2022 enggau Kejohanan Petanque Triple Terbuka Piala YB Datuk Ali Biju 2022.
"Barang ke bisi dijual orang dagang ba Uptown tu nyengkaum barang pemakai, gari, ai irup, kereban, barang ke dikayan nembiak enggau ke bukai sereta semua dijual ngena rega ti patut," ku Abadi.