Anda di sini

Sarawak semina nerima pemesai ke ngembuan integriti tinggi

Advertisement

LIMBANG: Semina pemesai enggau raban polis ke ngembuan integriti tinggi enggau nadai dipansik ari sebarang ngereja penyalah tau dianjung gawa ke negeri tu, ukai ke bisi penanggul, pia ku Premier Sarawak Datuk Patinggi Tan Sri Abang Johari Tun Openg madah nyemetak.

Ku, Sarawak enda begilik penemu ambika Polis Diraja Malaysia (PDRM) nganjung pemesai enggau raban ke ngembuan integriti tinggi sereta nadai dipansik ngereja sebarang penyalah,gawa ditu.

"Kami udah ngemansutka siti penerang ari Opis Sekretari Perintah Negeri.

"Nya endang penemu Perintah Sarawak, penerang nya," ku iya lebuh dirandau maya aum media pengudah bejadi Muzium Limbang ba Waterfront Sungai Limbang ditu, kemari.

Sama bisi enggau maya nya, bini iya Datuk Amar Juma'ani Tun Tuanku Bujang, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah,Sapit Menteri Pemansang Menua Pesisir Datuk Hasbi Habibollah, Sapit Menteri Betanam Betupi Moden enggau Pemansang Kandang Menua Datuk Dr Abdul Rahman Ismail, Kaban Kunsil Negeri Batu Danau Paulus Palu Gumbang, Sekretari Perintah Sarawak Dato Sri Mohamad Abu Bakar Marzuki enggau Residen Bagi Menua Limbang, Sebi Abang.

Abang Johari (lima kanan) enggau Juma'ani, Abdul Karim (enam kanan) begulai enggau bala ketuai bukai begambar ke kenang ba mua Muzium Limbang, kemari.
Abang Johari (lima kanan) enggau Juma'ani, Abdul Karim (enam kanan) begulai enggau bala ketuai bukai begambar ke kenang ba mua Muzium Limbang, kemari.

Opis Sekretari Perintah Negeri kena Hari Tiga udah ngemansutka siti penerang ti madahka enda nerima langgur penemu nganjung raban ti bisi penanggul gawa di negeri tu, baka ti dipansutka dalam sebengkah surat  berita ba hari ke sebedau nya.

"Perintah Sarawak nyambut manah pengawa ti dipejalaika PDRM deka nambah penyampau raban sida kena ngenegapka agi pengawa nyaga pengelikun, ke pemaik rayat Sarawak, tang kami ngarapka PDRM nganjung pemesai enggau raban ti ngembuan integriti tinggi sereta nadai dipansik ngereja sebarang penyalah," pia ku penerang ari Opis Sekretari Perintah Negeri.

Penerang nya digaga berindik ari berita ti dipansutka ba surat berita, ke alai Sapit Kepala Polis Selangor Datuk S. Sasikala Devi bisi nyebut madahka semilan iku raban polis ke bekaul enggau kes mejal bedau lama udah, deka dipindah kereja ngagai Balai Polis di Sabah enggau Sarawak.

Kena ngujungka penerang nya, Opis Sekretari Perintah Negeri madah, PDRM nyambut manah langgur penemu perintah Sarawak lalu deka madahka pemutus nya ambika diperatika baru.

Ba pengerami nya, Abang Johari madahka Limbang ngembuan kereban sejarah enggau artifak di Muzium Limbang ti mandangka pengelebih chara idup sereta kaul Limbang enggau Brunei nengah sungai ngena kapal, ti nyelai jeman kelia.

"Muzium Limbang mega mandangka gaya pengidup mensia mayuh di Lawas, semua kereban sejarah enggau artifak tu deka nyadi siti referan ngaga tebangkar  akademik enggau sejarah lama," ku iya.

Ngenang silik agi iya madah, Limbang ngembuan pesaka  kediri empu, budaya,jaku, chara idup enggau artifek ti digumpul sereta dipandangka dalam sebuah begunan.

"Nya mandangka chara idup ba kandang menua sida empu nyegnkaum Limbang.

"Sehari tu kitai ulih nirika muzium baru ke beguna amat ngena agih belanja lalu nyadi ke pengingat ngagai rebak diatu enggau ke dudi ila," ku iya

Muzium Limbang ke beungkus RM6.39 juta nya berengkah dibuka dalam taun 2019, ngembuan galeri alai bejalaika pengawa enggau galeri pemansang berengkah ari era Brooke, ditangkanka enggau  pemansang sosioekonomi Limbang, Trusan enggau Lawas.

Langkar Muzium Limbang digaga bechuntoka Rumah Kuarters Perintah lalu nyadi saksi tukuh ketuai Sarawak, Premier Sarawak Datuk Patinggi Tan Sri Abang Johari Tun Openg.

Advertisement