Anda di sini

Festival Kuching ngempuruka bemacham budaya, pemakai enggau orang dagang

Advertisement
Dr Sim (tengah) simbolik bejadi Pesta Ria Festival Kuching 2022. Sama bisi dipeda dia, Abdul Karim (kanan Dr Sim) enggau bala menteri kabinet negeri Sarawak ke bukai.
Dr Sim (tengah) simbolik bejadi Pesta Ria Festival Kuching 2022. Sama bisi dipeda dia, Abdul Karim (kanan Dr Sim) enggau bala menteri kabinet negeri Sarawak ke bukai.

KUCHING: Sapit Premier Sarawal Dato Sri Dr Sim Kui Hian madah, Pesta Ria Festival Kuching tau dikumbai siti ari  pengerami ke pemadu besai di Mengeri Besai Kuching laban nya ngempuruka bemacham budaya, pemakai enggau orang dagang. 

Ku iya, taja nya bepun ari ke mit, dalam taun 1980an, nya jampat ngerembai nyadi pengerami ke besai.

"Diatu,bisi rayat Sarawak ti diau di Singapura mulaika diri kitu semina ketegal deka ke festival enggau sida sebilik," ku iya lebuh bejaku bejadi Pesta Ria Festival Kuching ba laman dewan mensia mayuh Majlis Bandaraya Kuching Selatan (MBKS) ditu kena malam Hari Dua tu tadi.

Dr Sim ke mega Menteri Pengerai Mensia Mayuh, Pengawa Berumah enggayu Kaunsil Kandang Menua  madah, Festival Kuching mandangka semengat Kuching nyadi "Bandaraya Perpaduan', komuniti pupu bansa bansa sama begulai berami ngeratka agi tanggam kaul. 

Iya mega berasai gaga ati laban mayuh bansal ke nyual barang dipejalaika raban nembiak ti mandangka kreativiti dalam kulinari sereta dagang sida.

Dr Simmega meri terima kasih ngagai Gerempung Ukai Dikuasa Perintah ( NGO) laban udah mandangka budaya ba atas panggau melepu ba Taman MBKS beserimbai enggau festival nya.

"Pengawa ti dipejalaika terabai menua pengawa berubat enggau raban neritka adat maya pandemik COVID-19 dua taun udah,bejalaika kimpin vaksinasyen enggau chara  besai, ngujungka kitai ulih idup baka selama baru taun tu," ku iya.

Dr Sim mega meri pengaga ati ngagai MBKS laban udah bejalaika pengawa enggau manah ti ngujugnka Kuching diaku nyadi Bandar Kreatif UNESCO kategori Gastronomy  seretenda meransang ngena plastik ari baruh agenda ngenanka rampa menua asal.  

"Semua mesti bekerejasama ngemujurka juluk ari nengah Strategi Pemansang Pengudah COVID-19 (PCDS) 2030,ambika Sarawak nyadi negeri maju bepenatai pemisi besai.

Berebak enggau nya, Datuk Bandar MBKS, Dato Wee Hong Seng dalam jaku pengelalu iya madahka festival nya mujur matak penatai 200,000 iku ba minggu keterubah diatur, lalu urung 60,000 iku orang datai  dirikodka ba hari keterubah.

"Taun tu, Kuching nyadi mengeri  besai keterubah di Malaysia, sebagi ari 'Rentayan Bandar-Bandar Kreatif UNESCO', begulai enggau 295 mengeri besai di serata dunya dalam bidang kreatif, enggau 48 buah agi mengeri besai gastronomi antarabansa, bekerejasama sereta besilih pemakai, siti budaya ti nyelai," ku Wee.

Ku iya baru, siti ruai dibuka ba festival nya ti mandangka ekosistem pemakai kreatif Sarawak enggau pengawa kolaboratif gastronomik ti nyadi sebagi ari kena ngaku Bandaraya Kreatif UNESCO kategori Gastronomi.

Ba Pesta Ria Festival Kuching ke sekali itu bisi  muka 327 bansal nyual pemakai menua tu enggau antarabansa, 90 operator ungkup gerai pengerami dagang, siti sukut taman enggau panggau besai alai enda ngengetu merindang muak ke malam pengelama 24 hari.

Taja pan hari ujan, pengawa mandangka bungai api tetap diatur enggau pengawa ngeraun Pesta Ria Festival Kuching ti betuaika Dr Sim, mega dipajakka.

Bala temui ke bisi ngulu pengerami nya, Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah enggau bala menteri kabinet negeri.
 

Advertisement