KUCHING: Kaban Kunsil Negeri Belaga, Datuk Liwan Lagang (gambar) enda ngelaluka penatai semilan iku polis ti dituduh mejal orang dagang dipindah ke Sarawak enggau Sabah.
Liwan ti mega Sapit Menteri Utiliti enggau Telekomunikasyen madah semilan iku polis nya patut diketuka tekala nya laban sida iya udah nyata amat nyadi ngagai opis nya.
“Sida enda dikelaluka di Sarawak kelebih agi di Belaga.
“Keterubah, aram kitai ngengkahka pekara tu dalam perspektif ti betul. Nama kebuah Sarawak enggau Sabah nyadi alai muai buah epal ke buruk.
“Sarawak, enggau rampa menua ti besai sereta mar patut perintah pemesai perintah ti pemadu manah, kelebih agi pemesai neritka undang-undang ari perintah besai gawa ke rayat ditu lalu ukai buah epal ke buruk,” ku iya.
Liwan meri penerang nya bekaul enggau semilan iku polis ti dituduh mejal siku orang dagang di Selangor apin lama.
“Kedua, berindik ari semilan iku polis tu udah dipansik ketegal bisi kaul enggau penyalah mejal, nama kebuah dianjung gawa kitu? Sekalika nya enda kebuah ti chukup manah kena muai sida?,” tanya Liwan.
Nitihka ripot berita Bernama, Sapit Ketuai Polis Selangor Datuk S Sasikala Devi apin lama madahka semilan iku polis ditan awakka mantu pengawa mansik bekaul enggau kes mejal siku orang dagang dipelaba bekaul enggau isu dadah, di Gombak apin lama.
Iya madahka semua raban polis ti bepangkat konstabel nyentuk ke sub-inspektor nya ditan ba indu opis polis pelilih menua Gombak.
Iya madahka sida nya nya ditan pengudah ripot diterima ari orang dagang ke beumur 32 taun nya, kena 26 Julai apin lama.
Devi mega madahka pansik dipejalai nitihka Seksyen 384 Kanun Keseksaan kelimpah ari pansik ba setang disiplin ke deka dipejalaika.
Liwan bebendar madah baru, nyema semilan iku polis nya dipansik, sida patut ditan sereta enda ngemendarka sida bekesegau peneka ati sereta dianjung ke Sarawak enggau Sabah.
“Chukup mih suah amat sida ke diburu ke Sarawak ari baruh Akta Restricted Residence, udah meri sagam ati ti enda lantang ba peranak ba menua tu.
“Sereta diatu sida nganjung buah epal buruk ke Sarawak. Sarawak ukai palan muai uras,” ku Liwan nandu jaku iya.
Liwan ti mega Mandal Presiden Parti Rakyat Sarawak (PRS) sepenemu sereta nyaup penemu ketuai politik ari Sarawak enggau Sabah ti madahka diri enda lantang ati enggau pemutus ke digaga perintah besai bekaul enggau isu nya.