Anda di sini

Raban pemansik patut nyadi innovator teknologi enggau penemu pemadu baru

Advertisement

Raban pemansik patut pansut ari zon nyamai ti bepanggai ba pansik enggau teknologi ke dikemeranka ke diatu

 

Dikarang Rengenyan Labang

KUCHING: Raban pemansik di negeri tu patut sedia ngubah runding ari nyadi penguna ngagai sesiku orang ti nempa runding tauka innovator teknologi enggau penemu pemadu baru.

Sapit Menteri Pemansang Mengeri, Pengatur Tanah enggau Rampa Menua Datu Len Talif Salleh madah, raban pemansik patut pansut ari zon nyamai ti bepanggai ba pansik enggau teknologi ke dikemeranka ke diatu.

Iya madahka bala pemansik patut ulih nyingkang ke mua awakka teulihka asil pansik ke bisi empas tinggi kelebih agi ba pengawa nyaga enggau ngemansangka biodiversiti.

“Asil pengawa pemansik ti bisi empas bisi potensial kena ngemanahka agi dunya ti alai kitai diau tu, ngangkatka tikas pengerai kitai, ngemansangka undang-undang kitai, madah ngagai pengaga polisi, ngaga teknologi baru enggau ngangkatka tikas kualiti idup.

“Raban pemansik mega patut ngiga chara ngelala bagi bansa pansik ke patut dipejalaika di Sarawak ke nyingkang ke mua ba kandang endur nya (ke dipansik),” ku iya.

Len mansutka pekara tu lebuh iya bejaku seraya bejadi Seminar Heart of Borneo (HoB) Sarawak, Seminar Ekspedisyen Saintifik Gunung Pueh Forest Reserve (FR) ke diatur Opis Kampung Sarawak (FDS) ba sebuah hotel ditu, kemari.

Bejaku baru, iya madahka apin lama perintah negeri  ngemeratka pekara bekaul enggau pengawa mansik orkid sereta udah ngemendarka RM5 juta kena numbuhka taman orkid, ti nyadi pelasar pengawa bejalaika pansik bekaul enggau orkid di negeri tu.

“Tu ngayanka siti agi penyulut dalam pengawa mansik orkid enggau pemansang iya sekalika ungkup spesis ke endemik di Sarawak tauka Borneo kena nyaga tauka dijual,” ku iya.

Dulu ari nya dalam jaku pengelalu, Direktor FDS Datu Hamden Mohammad madahka opis iya bisi bejalaika kerejasama enggau sebuah universiti kena ngangkatka pengelandik enggau pengulih bejalaika pengawa mansik.

Nitihku iya, perintah bisi nempa kerejasama enggau Universiti Putra Malaysia (UPM) Kampus Bintulu, sereta nyiri universiti tu nyadi Hab Pengawa Mansik ungkup kampung di Sarawak.

Tuju nya kena ngemansangka pengulih enggau pengelandik ti relevan kena ngaga topik pansik ke diguna dalam jalai pemansut enggau ngaduka kampung.

“Aku ngarapka raban pemansik enggau pemesai kami deka ngena peluang tu nambahka pengelandik enggau pengulih bejalaika pengawa pemansik sida kena nentuka pekara ke dipejalaika sida meri asil ke lalu meri empas” ku iya.

Advertisement