Nya alai FDS, SFC diperansang ngatur ekspedisyen sainstifik begulai enggau organisasyen antarabansa dalam kandang HoB
“Nya kebuah aku meri langgur penemu ambika FDS begulai enggau SFC ari baruh Opis Menteri (Perambu Mengeri, Pengatur Tanah enggau Rampa Menua) sereta opis menteri ti bekaul ari perintah besai mai ejensi dalam enggau antarabansa, ngatur ekspedisyen awak teulihka pemutus tauka asil ke bisi empas ti lebih besai.”
Datu Len Talif Salleh
Sapit Menteri Perambu Mengeri,Pengatur Tanah enggau Rampa Menua
Dikarang Rengenyan Labang
KUCHING: Opis Kampung Sarawak (FDS) enggau Sarawak Forestry Corporation (SFC) diperansang ngatur ekspedisyen sainstifik dalam kandang ‘Heart of Borneo (HoB) Sarawak, nengah chara ‘joint-effort’ enggau organisasyen antarabansa.
Sapit Menteri Perambu Mengeri,Pengatur Tanah enggau Rampa Menua, Datu Len Talif Salleh madah, tu ngambika asil ari ekspedisyen nya teulihka asil ti lebih manah.
Iya madahka FDS enggau SFC tau merambu sereta ngatur ekspedisyen nya dalam timpuh dua tauka tiga taun ke deka datai.
“Nya kebuah aku meri langgur penemu ambika FDS begulai enggau SFC ari baruh Opis Menteri (Perambu Mengeri, Pengatur Tanah enggau Rampa Menua) sereta opis menteri ti bekaul ari perintah besai mai ejensi dalam enggau antarabansa, ngatur ekspedisyen awak teulihka pemutus tauka asil ke bisi empas ti lebih besai.
“Laban kelimpah ari lapan kandang endur ke udah alai ngatur ekspedisyen, agi bisi Kandang Ke Dijaga Endar (TPA) bedau diserungkai. Kandang endur baka Taman Negara Santubong, Taman Negara Kubah, Taman Negara Tanjung Datu enggau sekeda taman negara ke bisi di Sarawak ditu.
“Tu mega setipak, kelebih agi dalam inisiatif perintah negeri, PCDS 2030 ti ngemeranka pengelantang ekonomi ti mungkur sosiekeonomi enggau mensia,” ku iya.
Len mansutka pekara tu lebuh bejadi Seminar Heart of Borneo (HoB) Sarawak, Seminar Ekspedisyen Saintifik Gunung Pueh Forest Reserve ke diatur FDS ba sebuah hotel ditu, kemari.
Nitihku iya, perintah negeri Sarawak udah ngelala kandang endur urung 2.7 juta hektar ungkup HoB ti mungkur urung 26,000 km berengkah ari Taman Negara Tandung Datu, iya nya titik ke pemadu barat Sarawak ke Lawas, Limbang ba kandang menua Utara.
Pemesai kandang endur ungkup HoB Sarawak nya bisi urung 21 peratus ari penyampau semua tanah Sarawak, ku iya seraya madahka tu kandang endur ti besai deka dipatau sereta diadu ti deka meri pemar ba pengawa deka nyaga enggau ngetanka pemansang nya.
Taja pia ku iya, negeri udah bisi prestasi ti manah ba pengawa bejalaika inisiatif HoB, berindik ari bisi sukung semua ejensi perintah ti majak bejalaika tanggungpengawa, bejalaika aktiviti tauka program dalam kandang HoB, kena nentuka visyen H0B nya empu ulih nyadi nyata.
“Perintah mega meransang sektor peribit, NGO enggau institusyen akademik ambika terus nempa kerejasama enggau ejensi perintah ke ngatur mayuh bengkah aktiviti enggau program dalam HoB Sarawak.
“Kelimpah ari inisiatif HoB, apin lama, siti agi penyulut ke dijapai Sarawak iya nya Delta Sarawak Geopark ti diaku nyadi Geopark menua ke-6 ari baruh Program Pemansang Geopark Menua.
“Geopark tu munggur 311,246 hektar nyengkaum tanah enggau 'waterbodies' di pelilih menua Kuching, Bau, Siburan enggau pelilih mit menua Padawan,” ku iya.
Dulu ari nya, dalam jaku pengelalu Direktor FDS, Datu Hamden Mohammad lebuh ti ngenang bekaul enggau asil ekspedisyen saintifik madah, mayuh orang nanya pasal guna ekspedisyen lalu baka ni ulih meri penguntung ngagai menua dalam timpuh panjai.
Nyaut tanya nya, Hamden madahka orang sesiku nya patut meda sechara terus enggau penguntung enda tekala nya ke diulih ari asil ekspedisyen.
Nya alai nyadi siku saintis endang patut amat bekunsika asil pansik enggau nama utai ke ditemu enggau orang luar ke ukai dalam bidang tu, awakka ulih meda asil ari pengawa mansik sereta meri pengerindu ngagai orang ti ngembuan mayuh penerang, kena ngiga penemu baru enggau chara dikena napi penanggul ke nyadi ari ubah gaya hari, ku iya.
“Aku minta sereta meransang semua pemansik enggau pemesai Opis kampung tu ambika ngangkatka tikas pansik ngagai siti standard ti ulih meri empas tinggi ba utai ke ditemu, lalu pemutus ke diberi ngagai mensia mayuh sekalika maya kitai nyaga sereta ngintu flora enggau fauna kena nyeliah ari punas, taba ekodagang temuai ti bisi potensial, enggau produk ke ulih meri penatai pemisi ngagai mensia mayu sereta ke bukai,” ku iya.
Entara batang tuju seminar HoB Seminar Ekspedisyen Sainstifik Gunung Pueh Forest Reserve ke diatur 2 enggau 3 Ogos 2022, iya nya dikena bekunsika data enggau asil pansil saintifik, betukar penemu enggau ngelala bagi isu ti deka ngenegap, ngemanahka agi enggai ngangkatka strategi enggau insiatif.
Nambah nya, seminar ti dipasuk urung 200 iku nya, mega kena ngemanahka kaul enggau kerejasama entara staf FDS.
Asil ari seminar tu iya nya dokumentasyen aktiviti pemansik, data pansik saintifik sereta ulih nemu referan dikena ngemansangka Kampung Gunung Pueh sereta bekunsi potensial Gunung Pueh FR awakka ulih dikemansang nyadi siti taba eko-dagang temuai bepelasarka data.