Anda di sini

RADDA ngenapka perambu program pemansang Pelilih Menua Tengah

Advertisement

SIBU: Pengawa numbuhka Ejensi Pemansang Delta Rajang (RADDA) deka ngenapka perambu enggau program pemansang ti diperambu ejensi tauka  opis menteri bukai ti meri penguntung ngagai rayat.

Chairman RADDA, Datu Len Talif Salleh madah, "Kami enda betelisih, kami sama bela ngenapka, ngisi pemuang ari sukut infrastruktur, perengkaguna, ekonomi, betanam betupi enggau ke bukai. Nya alai, nya beguna amat.

"Engka bisi orang nyebut, nama kebuah mayuh amat ejensi? Kebuah pia, tetiap kandang menua di Sarawak ngembuan penyelai,pengering enggau pengelemi sida empu.

"Nya alai, kitai enda tau bisi siti saiz semua. Enti ejensi lebih fokus, kitai ulih ngelala program khas ke diguna ungkup kandang menua nya.

"Nya alai, kami ba RADDA ngelala, kami ngaga analisis SWOT (pengering, pengelemi, peluang enggau pekara ti tau ngenusah) nama pengering enggau pengelemi kami. Udah nya, kami nyendiaka preskripsyen ungkup pengelemi ke udah ditemu nya.  

"Nya kebuah, kami numbuhka mayuh ejensi ambika sida ulih fokus ngagai pengering enggau pengelemi ba kandang menua sida. Nya mih rasional ejensi tu ditumbuh," ku iya madah maya aum mediapengudah bejadi LAB Pemansang RADDA ditu, kemari. Makmal tembu kena 3 Ogos tu.

Sapit Menteri Pengeraja Asal enggau Pemansang Mengeri nya ditanya kebuah numbuhka ejensi pemansang nya.

Berebak enggau nya,Sapit Menteri ba Opis Premier Sarawak (Unit Pekara Korperat, Pemadah enggau Unit Komunikasyen Perintah Sarawak) Datuk Abdullah Saidol madahka perintah negeri nagit nempa Sarawak nyadi negeri maju manggai ba taun 2030.

Dalam dua tahun ke udah tu, agenda pemansang mayuh tejanggal ketegal pandemik COVID-19.

Premier Sarawak Datuk Patinggi Tan Sri Abang Johari Tun Abang Openg nguji ngenyampatka pemansang kelebih agi di menua pesisir.  

"Enti kita beratika semua ejensi tu RADDA enggau semua ejensi bukai lebih fokus ngagai menua   pesisir laban nya sebagi ari chara ketuai GPS  kena ngenyampatka semua pemansang tu

"Kena ngelengkaska semua projek pemansang di menu a pesisir, nya kebuah RADDA ditumbuhka," ku iya.

Berundingka saiz Sarawak, Abdullah madahka chara lama enda agi tau dikena ngemansangka menua pesisir.

"Nya kebuah, ejensi  ke baka tu ditumbuhka. Ba runding aku nadai negeri di Malaysia ngembuan chara pemansang ke baka tu ti ngerapitka seraka pemansang enggau pengelantang di mengeri enggai menua pesisir," ku iya.

RADDA mungkur Bagi Menua Sibu enggau Mukah ke urung 10,786 kilometer persegi mungkur 11 DUN enggau 10 pelilih menua sereta ngembuan penyampau tubuh urung 300,000 iku.

Makmal pemansang RDDA pemadu beguna kena  nyediaka ripot ngagai Sekretari Perintah Negeri sebedau keretas kereja dipejuraika dalam aum kabinet ke deka datai.

Advertisement