MIRI: Seni tekstil ari Malaysia nyengkaum batik linut ari Sarawak deka nyadi ti keterubah diberi kelala di menua timur tengah.
Menteri Dagang Temuai, Seni enggau Main Asal Dato' Sri Nancy Shukri madah, promosyen ti ngaul penyereta orang ti nempa fesyen menua tu ngasilka seni baka batik, kain tenun enggau kain songket.
“Kitai bedau kala mai tekstil ke menua timun tengah. Lalu aku ngasai kitai patut ngangkatka tekstil tu kia. Kitai patut ngayanka tekstil kitai, ti bechura batik baka batik linut.
“Kitai deka bala penengkebang ngayanka ngagai dunya iya nya kitai bisi tekstil diri empu ti ulih narit pengerindu sida (temuai menua luar),” ku Nancy.
Bejaku bekaul enggau tu ngagai pengarang berita, Nancy madahka, opis menteri ngembuan pengandal deka ngatur pengawa pemandang ti besai di Dubai ungkup tuju nya.
Nitih ku iya, projek agi dalam proses ngelangkar nyengkaum mai sama nyereta mayuh bala penengkebang fesyen.
“Kitai deka ngaga promosyen di luar, London, Paris. Tang naka ke diatu kitai ngelangkar di London enggau Dubai,” ku iya meri penerang.
Bekaul enggau batik linut, iya chukup muji pengempu dagang Diana Rose sereta Kraftangan Malaysia Sarawak ti udah meri kelala seni tekstil baru nya ti nyadi asil inovasyen seni asil pengelandik jari nguna produk di menua tu iya nya linut ari tepung sagu dikena ngasilka batik.
Inisiatif ti ngena linutnyadi barang ke nganti dian dipejalaika ba taun 2019 lalu ngatur Makmal Teknikal Ngaga Batik Linut begulai enggau 30 pesereta di Mukah.
Opis Menteri iya, MOTAC nengah mayuh ejensi baka Kraftangan Malaysia udah nyendiaka mayuh bantu ti meri peransang ngagai pengawa nyereta ari bala rayat ngasilka produk inovasyen.
“Di Sarawak, kitai ngena memanah nama ti benung digaga kitai diatu. Diatu kitai bisi batik linut. Nyema bisi inovasyen ngasilka produk ungkup Sarawak enggau Malaysia, endang dikelaluka. Sida ulih bekunsi,” ku iya nerang.
Diana ti mega Penengkebang Lamin Dana Resort di Mukah madah, Miri udah dipilih nyadi palan ngatur pengawa enggau dagang produk tu ti dilabelka iya nyadi batik keterubah Sarawak.
“Sebedau tu kitai bisi langkar batik Sarawwak tang nguna chara nyengkaum nyelak ari luar,” ku iya nerang.
Sama bisi datai iya nya Kaban Parlimen Sibuti Lukanisman Awang Sauni, Ketuai Sekretari MOTAC Datuk Saraya Arbi, Direktor Kraftangan Sarawak Azran Arip enggau Residen Miri Abdul Aziz Mohd Yusuf.