Anda di sini

Raban nembiak rebak baru Dayak dilalau terus belajar, ngetanka main asal

Advertisement
Majang nyuaka setipikit tembu ngajat ngagai siku ari pesereta ti ngambi bagi dalam program tu.
Majang nyuaka setipikit tembu ngajat ngagai siku ari pesereta ti ngambi bagi dalam program tu.

BINTULU: Raban nembiak rebak baru Dayak kelebih agi di bagi menua tu patut terus belajar enggau nguasa main asal ngajat ti nyadi tradisyen ke endang dipeturunka kenyau ari dulu kelia.

Sapit Menteri Infrastruktur enggau Pemansang Palan Penyangkai Datuk Majang Renggi madah, ngajat ti udah nyadi siti ari penyelai asal bansa Dayak kelebih agi Iban patut terus dikerembaika ungkup rebak baru kemaya hari tu.

“Tu dikena nentuka siti ari main asal ke dipeturunka ari aki ini kitai deka terus meruan tejaga nyentuk ke jemah ila,” ku iya lebuh ti bejaku ba Pengerami Tembu Ngajat Taboh enggau Sape diatur Gerempung Pengemeran Seni Ajat Pelilih Menua Bintulu (PEMENTAS) di Dinner World Restaurant Bintulu kena malam kilah ensana.

Ku iya nerang, ngajat tu mega ulih nyadika sebengkah ari produk tauka siti ari penyali ti ulih matak penatai temuai ti datai ari dalam enggau menua luar.

“Nya alai, ngajat tu ulih dikomersialka nyadi siti ari pematak ti pemadu beguna di Bintulu enggau mega kelebih agi Sarawak,” ku iya nerang.

Pia mega, ku iya, ngagai bala apai indai endang diperansang nganjung anak sida ke kelas ngajat di institusyen ti manah baka PEMENTAS laban tu iya nya siti ari chara anak sida ngisi maya lepa enggau aktiviti ti manah sereta meri pemaik.

Nya alai, Majang ngarapka seni ngajat enggau main asal ti baka tu ulih seruran dijaga enggau dibantiaka laban tu iya nya pesaka kaum Dayak ti chukup tebilang kelebih agi ngagai raban nembiak rebak baru.

Sama datai iya nya Kaban Kunsil Nengeri (ADUN) Jepak Datul Talib Zulpilip.

Advertisement