RUU tu enda ibuh dibantaika laban udah ditukuka dlaam Konstitusyen Sarawak, ku Fadillah
"Tang bepanggai ngagai perintah Sarawak mansik sekalika bisi pematut ngaga undang-undang ti sama enggau Perintah Besai tauka chukup semina ngenuku ke udah bisi."
Dato Sri Fadillah Yusof
Menteri Kanan Kerja Raya
KUCHING: Sarawak patut mansik enggau silik pasal pematut ngubah undang-undang bekaul anti merejuk parti berindik ari Dewan Rakyat ngemendarka Rang Undang (RUU) Perlembagaan (Pindaan)(No 3) apin lama.
Menteri Kanan Kerja Raya Dato Sri Fadillah Yusof madahka, ari pekara pemun nya Sarawak enda ibuh mantaika RUU Anti Merejuk Parti ba renggat negeri laban nya udah ditukuka dalam Konstitusyen Sarawak.
Taja pia ku iya, iya enda ulih diteritka laban kes kort di Kelantan sebedau tu ngaga pemutus peruntukan nya enda sah ari sukut undang-undang laban belaban(bercanggah) enggau Perlembagaan Persekutuan.
"Nya alai, lebuh konstitusyen diatu udah diubah (RUU Anti Merejuk Parti), reti nya undang-undang ditukuka nya (renggat Sarawak) engka diatu ulih diteritka.
"Tang bepanggai ngagai perintah Sarawak mansik sekalika bisi pematut ngaga undang-undang ti sama enggau Perintah Besai tauka chukup semina ngenuku ke udah bisi.
"Nya sida patut mansik ari sukut undang-undang tang Sarawak nadai penanggul enggau nya alai, kitai nyukung penuh. Sebedau tu kitai udah ngaga undang-undang ti sama," ku iya ba aum pengarang berita pengudah bejadika Opis Sekretariat enggau bejadi Logo Ngintu Genap 50 Lembaga Jurutera Malaysia ditumbuhka ditu, kemari.
Iya madahka pekara nya lbuh ditanya pasal penerang Menteri ba Opis Menteri Besai (Pekara Sabah enggau Sarawak) Datuk Seri Dr Maximus Ongkili ba Hari Lima, ti minta Kunsil Negeri (DUN) Sarawak enggau Sabah patut lengkas bejuraika RUU Anti Merejuk Parti ba renggat negeri dalam timpuh 60 hari.
Ongkili madahka, tu laban ubah Perlembagaan Persekutuan tu nagang Kaban Parlimen betukar parti ti dikemendarka Dewan Rakyat enda dikena ba kededua DUN tu.
Berindik ari pekara nya, Fadillah madahka, nya nyadi tanggung pengawa Peguam Besai Negeri Sarawak masik sekalika patut diubah undang-undang bekaul enggau di Sarawak.
"Tauka chukup semina bajalaika aja ke udah bisi ditukuka," ku Fadillah ti mega Ketuai Whip Gabungan Parti Sarawak (GPS) enggau Naib Presiden Kanan Parti Pesaka Bumiputera Bersatu (PBB).
Hai Empat apin lama, ubah Perlembagaan Persekutaun ti dikena numbuhka peruntukan nagang Kaban Dewan Rakyat betukar parti tauka lebih dikelala enggau leka jaku 'lompar parti' bulih sukung lebih dua pertiga kaban dewan, ti lalu nempa sejarah ke ngubah landskap politik menua.
RUU Perlembagaan (Pindaan) (No. 3) 2022 nya bulih sukung 209 ari 220 Kaban Parlimen.