Anda di sini

Gerempung Tuai Rumah, JKKK patut numbuhka Komiti Pemansang Tanah

Advertisement
Rentap begambar bebala mayuh enggau 74 iku bala tuai rumah ke nyadi pesereta siri keterubah Kursus Pemantapan Kepimpinan Ketua Kaum DUN Layar, kemari.
Rentap begambar bebala mayuh enggau 74 iku bala tuai rumah ke nyadi pesereta siri keterubah Kursus Pemantapan Kepimpinan Ketua Kaum DUN Layar, kemari.

Dikarang Rengenyan Labang

KUCHING: Gerempung Tuai Rumah sereta Komiti Pemansang enggau Pengelikun Genturung Pendiau (JKKK) lebih agi dalam Kunsil Negeri (DUN) Layar diperansang numbuhka Komiti Pemansang Tanah.

Sapit Menteri Nembiak, Lumba enggau Main, enggau Pemansang Orang Dagang Sarawak, Datuk Gerald Rentap Jabu madahka, tuju numbuhka komiti pemansang tanah nya awakka ulih ngatur pengawa nyukat tanah sechara individu ari baruh Seksyen 18 Kanun Tanah Negeri (KTN).

Kaban Kunsil Negeri (ADUN) Layar tu madahka gerempung nya ulih nitihka chara tauka pilot projek ke dipejalaika DUN Bukit Saban ti neladan Persatuan Kebangsaan Dayak Bidayuh (DBNA) ba pengawa nyukat tanah.

“Kitai meransang sida Gerempung Tuai Rumah enggau JKKK numbuhka komiti pemansang tanah. Kitai minta sida ngatur tu lalu nyadika tu siti projek sida dalam setaun ngagai tiga taun tu.

“Tuju tu ngambika sida ulih ngatur pengawa nyukat tanah ari Seksyen 6 Kanun Tanah Negeri (KTN) ke endang udah bisi nya ngagai Seksyen 18 KTN.

“Kitai bisi tauka neladan model sida DBNA baka ke diatur tauka pilot projek di Paku ari baruh DUN Bukit Saban. Kitai mega deka nunda tauka ngaga pekara ti sama ba DUN Layar,” ku iya.

Rentap nerangka pekara tu lebuh dikerandau pengarang berita pengudah iya bejadi Kursus Pemantapan Kepimpinan Ketua Kaum DUN Layar ke diatur ba Sunset Ballroom, Damai Beach Resort di Santubong.

Bejaku baru iya madahka kena nyapai tuju nya sida surveyor deka mantu ngajar gerempung tuai rumah enggau JKKK tauka komiti pemansang tanah chara nyukat tanah ngena Global Positioning System tauka Sistem Kedudukan Global (GPS).

Iya bepenemu pengawa nyukat tanah ari baruh Seksyen 6 enggau Seksyen 18 KTN ulih jampat dipejalaika laban diatu agi bisi orang tuai ke ngelala bagi entara garis menua enggau entara garis individu.

“Tambah mega kitai bisi sida ke endang nyadi surveyor deka nulung ngajar ngena GPS.

“Enti nya ulih di survei, aku ngasaika nya deka nyadi pemadu dikemeratka ba timpuh tiga ngagai lima taun ke deka datai.

“Enti nuan udah bisi tanah ke endang udah ditentuka nuan ngempu nya abis nadai nuan bisi aset, sereta ambika chunto maya beguna nuan ulih mai tu ke bank kena ngambi loan enggau ke bukai,” ku iya.

Nitihku iya dalam DUN Layar tebal agi endang udab bisi Seksyen 6 tauka udah digazet komunal.

“Nya alai kitai meransang sida laban nya udah digazet (Seksyen 6) sereta udah tau minta disukat individu (Seksyen 18).

“Kandang endur ke tisi jalai nya tebal agi mayuh udah bisi surat pala tanah, kelimpah ari sida ke di ulu din,” ku iya seraya madahka ari baruh Seksyen 6A Native Terrritorial Domain (NTD) ulih minta urung nyentuk 500 hektar agi.

Kelimpah ari nya lebuh ke ngenang pemasang dalam DUN Layar, iya madahka tebal agi rumah panjai udah disambung jalai alun sereta semina di Lempaong dua buah rumah panjai enggau ari Muman ke Perdu ke bedau bisi jalai.

Iya madahka rumah panjai ke bedau disambung jalai alun nya deka digaga dalam timpuh ke deka datai, lebih agi perintah negeri udah numbuhka Agensi Pembangunan Bersepadu Betong (BIDA) ti diungkupka belanja sepenyampau RM1.5 bilion.

“Kitai beterima kasih laban enggau BIDA ti diungkupka RM1.5 bilion nya dipekunsi sereta dibagi ngagai enam pelilih menua iya nya urung RM200 milion ke tiap pelilih menua, lalu tu ulih dikena kitai ngaduka, baka jalai.

“Kitai ulih ngaga jalai kebun, ngemanhka agi jalai laban di ulu nadai agi jalai tanah, semina sida ari Muman ngagai Perdu sereta Lempaong ke bedau bisi jalai. Aku deka nyambungka sida ngena tu.

“Bala di Padeh mega deka ngadu jalai ari Pelepok terus ngagai Ajong. Enti bisi jalai nuan muka tanah lalu bisi peluang sida bekebun sereta mansutka asil sida ari nyin. Enti jalai kaki udah tentu enda ulih tambah mega umur sida majak tuai,” ku iya seraya madah nya entara perambu pemansang ke deka dipejalaika iya ba DUN Layar.

Rentap berebak enggau tu ngingatka apai indai ngambi ngemeratka pelajar anak sereta nentuka anak ngambika pelajar ke setipak enggau peminta dalam lima ngagai 10 taun ke deka datai awakka ulih kena ngidupka diri jemah ila.

Bekaul enggau siri keterubah kursus nya bisi dipasuk urung 74 iku bala tuai rumah enggau tuai raban bansa dalam DUN Layar, ti enggau objektif iya kena nambah enggau ngangkatka pengelandik enggau tekanik nyadi ketuai moden awakka ulih nyadi ketuai ti meri empas manah dalam jeman digital sereta nyikap bala tuai raban bansa bekaul agenda pemansang dalam DUN Layar sereta objektif ke bukai.

Sama bisi datai Sekretari Politik ngagai Premier Sarawak Dr Richard Rapu enggau sida kebukai.

Advertisement