KUCHING: Sarawak nagit 44 midul emas ba Lumba enggau Main Malaysia Ke-20 (SUKMA XX) Majlis Sukan Negara (MSN) 2022 di Kuala Lumpur, ti diatur berengkah 16 ngagai 24 September 2022.
Menteri Nembiak, Lumba enggau Main, enggau Pemansang Orang Dagang, Dato Sri Abdul Karim Rahman Hamzah madah diri arap bendar kontinjen Sarawak ulih teulihka midul emas ngelui ari ke ditagit nya, ti lalu dikearapka ulih nyadi champion.
Sarawak ba SUKMA Ke-20 nganjung 698 iku atlet ti deka belaban dalam 426 kategori pekit ari 31 bansa lumba enggau main ke dipelabanka, sereta kontinjen deka diketuaika Sapit Menteri Nembiak enggau Lumba enggau Main Dato Gerald Rentap Jabu ke nyadi Chief De Mission (CDM), ku iya.
"Kitai ngarapka enggau persiapan rapi tu , sarawak deka ulih bulih (midul) emas ti mayuh, tagit kitai 44 (midul) emas, tang aku pechaya kitai ulih teulihka ari penyampau ke ditagit nya.
"Aku meda bepelasarka SUKMA ke-19 di Perak ba taun 2018 champion maya nya bulih 56 midul emas, nya alai enti kitai deka nyadi champion SUKMA ke sekali tu penyampau midul mesti urung ba penyampau nya (56 midul emas).
"Laban timbal ke diterima kitai ari lumba enggau main ke diatu, sekeda bisi belatih di Sarawak sereta mayuh mega belatih di luar Sarawak. Kitai nerima timbal ke chukup manah pasal prestasi sida," ku iya ti ngarapka bisi berita manah ngenyit bulih emas ba mayuh kategori pekit kelimpah ari kategori pekit ke ditagit.
Abdul Karim mansutka pekara nya dalam aum pengarang berita pengudah bejadi pengerami 'Countdown 50 Hari Menjelang SUKMA XX, MSN 2022" enggau bejadi program "Our Star Our Pride" ke diatur ba Tebing Sungai Kuching, sereta iya disempulang Gerald enggau sida ke bukai, ditu, kemari.
Ditanya bagi kategori pekit ke diarap ulih meri kejutan ari kontinjen negeri ba SUKMA XX, Abdul Karim madahka nya nyengkaum baka basikal, BMX, ragbi, golf enggau ke bukai, kelimpah ari kategori pekit bukai ke mayuh meri emas ngagai negeri.
Lebuh bejaku ba pengerami tu, Abdul Karim, ngarapka nadai atlet Sarawak nadai 'penumpang' tang patut bebendar ngulihka pemujur sereta ngangkatka nama Sarawak ba SUKMA ke-20.
Nitihku iya pengerami nyuaka bendera negeri ari Premier Sarawak ngagai ketuai kontinjen Sarawak Sukma XX MSN 2022 kena 13 September 2022.
Kelimpah ari nya ba aum pengarang berita ti sama, ditanya sekalika atlet ari Sarawak ke ngarika Malaysia ba lumba enggau main Komanwel 2022 nyema bisi bulih midul deka diberi insentif, Abdul Karim madahka, tiap kategori pekit ba renggat antarabansa nyengkaum nasional baka SUKMA mesti bisi insentif enti atlet Sarawak menang midul emas, perak tauka engkeraju.
"Aku enda madahka (nama insentif) sehari tu, tang atlet semua nemu nyema sida menang emas mesti bisi insentif, perak sereta engkeraju mega bisi insentif nyengkaum sida atlet Sarawak ke menang ba Komanwel.
"Lebuh sida ngarika Malaysia, utai ke diarapka aku ngagai atlet Malaysia nyengkaum ke datai ari Sarawak ngarapka sida bisi komitmen tinggi sereta bebendar pengabis ati. Lebuh nuan ngarika menua, bebendar ngarika menua, tentuka nuan ulih menang enti ulih niki podium sereta bulih emas nya ke dikearapka kitai.
"Enti ba renggat negeri udah tentu kitai bebendar ngulihka ungkup negeri, enti renggat nasional baka nya mega, kitai mesti bebendar ngarika Malaysia, tu meh pengeransing kitai," ku iya.