KUCHING: Mandal Presiden Parti Pesaka Bumiputera Bersatu (PBB) Dato Sri Abdul Karim Rahman Hamzah bepenemu undang-undang bekaul enggau Rang Undang-Undang (RUU) Anti Merejuk Parti tau enda ibuh ditumbuhka laban pengundi ulih meda baka ni prinsip pengari rayat tauka kaban politik ti merejuk parti.
Iya ti mega Menteri Nembiak, Lumba enggau Main, enggau Pemansang Orang Dagang madahka pengundi ulih mereti sereta meratika pekara nya bekaul enggau pengari rayat tauka kaban politik ke nadai prinsip.
Iya madahka pengundi ulih nentuka sekalika pengari rayat tauka kaban politik ke nadai prinsip nya maya pengawa bepilih diatur baru.
"Enti nitih ku ati aku, kitai nadai ibuh RUU ti baka tu, pengundi patut meda pekara tu mega. Nyema sesiku orang nya nadai agi prisip, enti iya bediri minta pilih baru, anang agi ngundi iya.
"Tau enda ibuh bisi undang-undang nya, pengundi ulih merati tauka ngemutuska (memuktamatka) pekara nya, patut iya baka nya," ku iya.
Abdul Karim mansutka pekara nya lebuh ditanya raban pengarang berita bekaul enggau RUU Anti Merejuk Parti ke udah dikemendarka Parlimen, ba aum pengarang berita pengerami 'Countdown 50 Hari Menjelang SUKMA Ke-20 Majlis Sukan Negara 2022' ke diatur ba Tebing Sungai Sarawak ditu, kemari.
Dulu ari nya iya madahka RUU tu ungkup individu laban dalam parlimen tauka kaban kunsil negeri, undi nya ukai bepelasarka parti tang bepelasarka individu.
Maya nyadi pekara baka tu, ku iya, iya deka dipeda ari segi individu, sesiku orang nya enti minta pilih iya minta pilih ari baruh lambang siti parti.
"Pengundi milih orang nya ngambika nyadi pengari sida bepelasarka orang nya ke nyadi individu ke nyadi pengari parti ti dikearapka sida iya.
"Baka ke nyadi bediri ngati ke diri. Iya enda arapka parti bukai, iya deka nyadi Bebas, tang lebuh udah masuk parti iya merejuk.
"Nya alai mega udah tentu RUU nya manah, ti dikemendarka Parlimen. Nuan ulih meda nadai siku nyangkal iya nya 209 (ari 220 iku kaban parlimen) sereta ke 11 iku nya nadai datai. 209 ke bukai nya nyukung RUU tu.
"Nama ke diarapka kitai enggau undang-undang tu udah dikemendarka, iya deka ulih nyadika lalau kaban politik," ku iya.