KUCHING: Politik tegap enggau pupu bansa idup dalam pemaik sereta beserakup, ulih nyaup menua enggau rayat nyapai pemansang setipak enggau juluk nyadi negeri maju lebuh manggai ba taun 2030.
Sapit Chairman Yayasan Perpaduan Sarawak (YPS) Datuk Patinggi Tan Sri (Dr) Alfred Jabu Numpang madah, pekara ti manah ke udah dipun tauka dikemansang patut dipajak awakka Sarawak ulih mansang, rayat deka mansang lalu rayat bekelas dunya baka ditagit ba taun 2030 ti deka nyadi negeri maju enggau belimpah betuah di Malaysia.
“Kena nyapai tu kitai mesti bisi politik ti tegap, pupu bansa ti dalam pemaik, terus bekerejasama enggau semua ti enda ngira bansa enggau jalai pengarap di Sarawak
“Nambah nya kitai mega patut bebendar sereta nentuka kitai semua dalam pemaik kena nentuka Sarawak ulih maju, rayat ulih nyadi rayat bekelas dunya, ngembuan mayuh penau enggau pengelandik lalu ekonomi kitai deka mansang ti nuju ngagai IR 4.0, tu ke pemadu beguna.
“Kitai amat temegah sereta beterima kasih laban negeri Sarawak rayat iya beserakup, ngembuan ulah ti dekaka pemaik enggau pengelantang, sereta deka nerima penemu orang bukai, kelimpah ari ngembuan ketuai ke mega chukup bebasaka semua orang tauka bansa,” ku iya.
Iya mansutka pekara tu lebuh ti bejaku ba program ‘Advancing Racial Cohesion and Harmony’ (ARCH ke diatur YPS ba sebuah hotel ditu, kemari.
Bejaku baru, iya madahka serata Sarawak semua pupu bansa nadai kala belaya tauka belaban enggau pangan diri laban rayat endang dekaka pemaik tauka pengelantang ti lebih mai penguntung.
Iya mega bepenemu, program ti manah dipejalaika perintah patut disukung enda ngira sekalika YPS tauka oranginsasyen, raban ukai dikuasa perintah tauka kompeni peribit.
“Laban semina nengah chara tu kitai ulih ngasaika penegap, pemaik enggau pengelantang, bansa ti dalam pemaik ke lalu ulih mai Sarawak lebih maju, betuah belimpah enggau rayat nyadi rayat bekelas dunya lebuh manggai ba taun 2030,” ku iya.
Lebuh ti ngenang bekaul enggau program nya, Jabu madahka seminar ke diatur YPS deka dipejalaika ba semilan bengkah endur dalam tiga kandang menua.
Kandang Menua Selatan diatur di Kuching, Kota Samarahan enggau Bau; Kandang Menua Tengah di Sibu, Bintulu, Kapit enggau Mukah lalu ba Kandang Menua Utara dipejalaika di Miri enggau Limbang.
“Program ti baka tu deka meri peluang ngagai semua komuniti meri timbal pasal penemu sida.
“Pemadu beguna resolusyen ke diasil ari program ti baka tu deka diperambu ngagai perintah awakka ulih diperunding nyadi pelasar polisi sereta dipejalaika ti ngelantang enggau mai pemaik ngagai semua ti enda ngira bansa enggau jalai pengarap,” ku iya.
Dulu ari nya, Ketuai Ekekutif YPS Datu Aloysisus J. Dris madah, Sarawak ukai semina bisi mayuh pengeraja asal tang mega mayuh pupu bansa enggau budaya, sereta mega ngembuan sosial ti tegap ti amat beguna ke pemansang ekonomi.
Iya madahka udah nyadi tanggungpengawa YPS lalu semua orang nentuka raban biak kelebih agi di Sarawak ulih ngereja pengawa enggau mujur sebaka enggau bakih ke serebak di bagi menua bukai di menua tu.
“Kami arap bendar raban biak ulih bekerejasama rat nengah semengat nyadi siti tim laban sida ti deka ngiring menua jemah ila,” ku iya dalam jaku pengelalu, kemari.