KUCHING: Sarawak benung nyikap diri deka numbuhka kilang masang kerita energi hidrogen.
Sapit Menteri Energi enggau Ngetanka Rampa Menua Ngenanka Rampa Menua Dr Hazland Abang Hipni madah, nya setipak enggau polisi Sarawak iya nya polisi ekonomi gadung, kelimpah ari ti benung ngelangkar polisi bekaul enggau ubah gaya hari.
Iya madahka nengah pengawa numbuhka kilang masang kerita hidrogen ditu deka meri peluang ngagai rayat negeri tu meli kerita nya ngena rega ti murah agi enti dibandingka meli tauka diimport ari luar menua tu ti deka lebih mar ketegal chukai.
"Kitai mega deka bisi kilang masang kerita hidrogen di Kuching enda lama agi. Asai aku udah ba renggat MoU, udah ngiga tanah alai numbuhka kilang masang, semak ditu aja enda jauh ari BCCK.
"Berindik ari tu, rega kerita tu deka ulih dibeli laban dipasang kitai ditu. Enti kerita dipasang kitai di Sarawak, udah tentu deka murah agi dibandingka enggau enti kitai ngimport kerita hidrogen," ku iya seraya madakah penerang silik bekaul enggau pekara tu deka dipadahka Premier Sarawak.
Dr Hazland madahka pekara nya dalam aum pengarang berita pengudah iya bejadi Aum Energi Beresi Hidrogen Antarabansa (ICCE) 2022 ngarika Premier Sarawak, Datuk Patinggi Tan Sri Abang Johari Tun Openg ke diatur ba BCCK ditu, kemari.
Nambah nya, lebuh ditanya bekaul enggau pengelikun kerita kuasa hidrogen, Dr Hazland madah, mayuh orang enda ngira sekalika rayat ke diau di mengeri tauka menua pesisir saru penemu ngumbai nya hidrogen bom.
Ku iya nerang, hidrogen bom nya amat ngeruga pengelikun laban udah dichampur mayuh macham kimia lalu ngasilka bom.
Tang enti hidrogen aja, nya lempung laban nadai dichampur kimia, ku iya.
"Udah diuji, enti kitai nimbak dua tangki iya nya sigi petrol lalu sigi hidogren. Tangki petrol deka meletup, tangki hidrogen enda meletup.
"Enti penusah bebadi nyadi ba jalai alun tangki petrol tau meletup, tangki hidrogen enda meletup. Reti nya hidrogen selamat dikena.
"Pekara ke pemadu beguna iya nya pasal gadung. Enti nya gadung nya ulih nyelamatka dunya, nyawa enggau rebak dudi ila," ku iya.
Enti dibandingka entara hidrogen enggau petrol ku iya, hidrogen bisi pengering urung tiga ngagai lima kali lipat ari petrol.
Nya kebuah hidrogen mayuh dikena industri berat di menua baka Eropah, Korea enggau Jepun diatu, ku iya.
"Industri berat ngena hidrogen laban nya murah. Taja pan mar tang pengering iya tiga ngagai 5 kali lipat. Nya alai iya nyadi lebih murah ari diesel tauka petrol.
"Kedua, nya gadung. Enda ngira nama ti diasil tauka dipansutka kilang iya nya gadung, laban jemah ila dunya deka nuju ngagai dunya gadung.
"Sida (jemah) ila deka meda kualiti produk mesti produk gadung, lalu Sarawak deka nyadi pengeluar produk gadung, enda ngira nama ke dipansutka Sarawak semua nya deka ngemeratka gadung," ku iya.