KUCHING: Penemu enggau asai ti enda lantang ati bekaul enggau gaji ke diberi pengaji enda setipak enggau pemandai sereta kereja ke digaga rayat menua tu ti dipadahka Menteri Besai Datuk Seri Ismail Sabri Yaakob nya sebaka enggau pekara ti kala dibantaika Kongres Kesatuan Sekerja Malaysia (MTUC).
Sekretari MTUC Sarawak, Andrew Lo madahka, isu nya kala dibai Kongres dalam timpuh 20 taun ke udah.
"Penerang Menteri Besai nya ngena amat enggau pekara ti kala dibantaika MTUC kenyau 20 taun ke udah. Iya nya Malaysia suntuk kereja ti setipak enggau gaji ke patut. Tu ngujungka beratus ribu nembiak kitai ngiga kereja ba menua bukai.
"Apai indai melanjaka bepuluh, tauka ratusan ribu kena melanja pelajara anak sida. Perintah melanja bebilion dikena nyendiaka sekula teknikal enggau kolej sereta university, tang pengaji meri gaji ti baruh lebuh sida abis belajar. Asil dalam pelajar majak kurang," ku iya madah ngagai Utusan Borneo.
Andrew ditanya bekaul enggau isu tikas gaji pekereja enda setipak enggau pemandai sereta kereja pekereja menua tu di menua tu empu.
Andrew madah baru, setipak enggau singkang evolusyen ti nuju ngagai 'innovation-driven economy', nyaga pengelantang pendiau pekereja Malaysia enggau manah amat beguna kena nentuka sida terus diberi insentif ti betul awakka ulih ngangkatka produktiviti seraya nyapai nilai ti lebih besai dalam ekonomi.
Iya madah gaji semina meri 36 peratus ari KDNK ari 45 ngagai 55 peratus menua bukai ti setipak enggau Malaysia ti ngayanka pekereja Malaysia nerima pampas ti lebih baruh dibandingka enggau produktiviti enggau perspektif ekuiti sida.
Keterubah, ku iya, rayat Malaysia dibayar gaji ti lebih baruh disbanding enggau menua penanda aras(benchmark), taja pan udah mengambil kira bida produktiviti.
Kedua, Malaysia bisi bahagian penatai pemisi pekereja ti lebih baruh taja pan bepelasarka intensif pekereja, tu ngayanka pekereja enda diberi pampas ti chukup ungkup nama ti udah dikereja sida, ku iya.
"Nikika tikas gaji ulih nyadi sebagi ari chara dikena ngangkatka produktiviti ke enda tegap. Pekara ti dipetalatka asal iya nya kitai semina ulih tauka patut niki gaji enti produktiviti niki, udah disangkal. Kitai patut ngidupka baru jaku tu enggau pemisi empirikal iya nya nikika tikas gaji ulih mantu ngangkatka produktiviti, sereta meransang pengaji ngambika beranakka puku.
"Tu ngayanka pekara baru bekaul enggau undang-undang pekereja/buruh patut jampat dipejalaika nyengkaum Akta Kesatuan Sekerja, sebedau penanggul tu majak balat. Tu iya nya tanya tusah ti begunaka pertimbangan ti pintar enggau tindakan ti komited," ku iya.
Ensanus bepelasarka ripot berita, di Kuala Lumpur, Menteri Besai Datuk Seri Ismail Sabri Yaakob madahka diri enda lantang ati meda penyampau gaji diberi pengaji enda setipak enggau kelayakan sereta kereja digaga rayat menua tu.
Ismail madah bepelasarka statistic MYFuture Jobs, bungkur(lingkungan) gaji ungkup pengawa puang ke mayuh disediaka di serata menua iya nya entara RM1,200 ngagai RM2,000 sebulan.
"Perintah diatu chakah ngemansangka ëtalent poolí ti bepengelandik, produktif enggau bisi potensyel tinggi, tang aku bisi enda lantang ati laban gaji ke diberi pengaji enda setipak enggau kelayakan enggau kereja ke digaga ulih anak menua tu.
"Berindik ari pekara tu, aku minta ngambika pengaji ngemeratka ba pekara tu laban pekereja iya nya tulang belakang enda ngira oraganisasyen, iya nya sida ulih ëngaga tauka mambarkaí sesebengkah pengawa dagang," ku Ismail.