KUCHING: Menteri Pemansang Orang Indu, Nembiak Mit enggau Pengelantang Pendiau Raban Bansa Dato Sri Fatimah Abdullah ngarapka Rang Undang-undang (RUU) 'Keselamatan Sosial Suri Rumah 2022' ke udah dikemendarka Dewan Rakyat ulih nyengkaum orang indu ke ngibun ruang bilik dalam raban M40.
Laban ku iya, RUU nya manah sereta ulih nyaga pengelikun orang indu ke ngibun rumah tangga.
Dewan Rakyat ensanus ngemendarka RUU Keselamatan Sosial Suri Rumah 2022 ti dikearap ulih nyamin pengelantang pendiau sosial orang indu ke ngibun rumah tangga, ruang bilik enggau raban bansa nengah Skim Keselamatan Sosial Suri Rumah (SKSSR) ke deka ditumbuhka.
"Iya dipeda tauka didinga manah (bedau nerima silik chara dipejalaika). Tu deka meri rentayan pengelikun rama ngagai bini.
"Naka ke diatu kitai bisi i-Suri ari baruh Kumpulan Wang Simpanan Pekerja (KWSP) ti meri penguntung sereta pemanah ngagai orang indu ke ngibun rumah tangga ke bisi dalam pangkalan data ekasih ungkup sida ke seranta.
"Nya alai chukup manah enti RUU Keselamatan Sosial Suri Rumah tu ulih mungkur ukai semina raban B40 tang mega patut nyengkaum M40 tauka orang indu ke ngibun rumah tangga dalam raban penatai pemisi sederhana (middle income)," ku iya lebuh ditanya Utusan Borneo, kemari.
Fatimah ditanya bekaul enggau Dewan Rakyat ti udah ngemendarka RUU Keselamatan Sosial Suri Rumah 2022 ti dikearap ulih nyamin pengelantang pendiau rama orang indu ke ngibun rumah tangga, ruang bilik enggau raban bansa nengah Skim Keselamatan Sosial Suri Rumah (SKSSR) ke deka ditumbuhka.
Sapit Menteri Sumber Manusia Datuk Awang Hashim lebuh bejuraika RUU ti ngundan 11 bahagian, 97 fasal enggau lapan jadual nya ba bacha kali kedua madahka, SKSSR dipejalaika Pertubuhan Keselamatan Sosial (Perkeso) iya nya ngerembaika rentayan nyaga pengelikun rama ngagai bala raban bansa ke enda dilindung tauka dijaga ngelama tu.
"Raban tu mega sama terdedah enggau mayuh penanggul baka penusah bebadi, penyakit, keilatan, penanggul rumah tangga tauka ungkus sara hidup ti niki ke lalu nadai sukung ari aspek bantu duit enggau nyaga pengelantang pendiau," ku iya diambi jaku ari ripot Bernama.
Bekaul enggau umur ke dijaga skim, Awang madahka RUU semina ungkup orang indu ke ngibun rumah tangga beumur kurang 55 taun enggau enda dikena ngagai sida ke manggai umur 54 taun sereta sida ke enda kala mayar enggau SKSSR.
Berindik ari pekara nya, Fatimah madah baru, orang indu ke ngibun rumah tangga diperansang mayar dalam skim tu (SKSSR), laban mayuh pemanah enggau penguntung disediaka.
"Sida ke mayar dalam skim deka bulih penguntung ari segi perubat sereta penimpang pendiau. Nambah nya, taja pan pengudah sida sarak tauka mati laki, sida agi patut bulih penguntung nyentuk abis timpuh mayar," ku Fatimah.