KUCHING: Belanja ti besai dikena berubat penyakit tungkul ati diatu udah ulih dikurangka di Sarawak, ku Ahli Lembaga Amanah Yayasan Jantung Sarawak Datuk Amar Jamilah Anu.
Nitih ku iya, kebuah pia tu laban bisi yayasan ti bechairmanka Tuai Pemegai Menua Tun Pehin Sri Abdul Taib Mahmud.
“Enti dibandingka enggau taun 90-an, ungkus berubat diatu ulih dikurangka laban pemisi Yayasan Jantung Sarawak,” ku iya maya Program 'Sayangi Jantung Anda' beserimbai enggau Hari Sarawak 2022 di Balai Mayuh guna Mahligai Gading Lundu, bedau lama ti udah.
Ku iya madah, yayasan tu iya nya gerempung ukai dikuasa perintah (NGO) ti mantu ukai semina pesakit tang mega nentuka sepital chukup enggau perengkaguna sereta pakar tungkul ati.
“Tu ngambika pesakit tungkul ati di Sarawak enda agi ke menua luar tang, ulih bulih servis berubat tungkul ati ditu,” ku iya.
Beserimbai enggau nya, iya ngelalau mensia mayuh kelebih agi raban ti udah lunggar umur ngambika beperesa tungkul ati ba fasiliti pengerai.
“Sayauka mih tungkul ati kita laban tu iya nya rengka dalam ti pemadu beguna ba tubuh kitai,” ku iya.
Dulu ari nya, lebih 200 iku orang ti dikangau iya nya ari raban ketuai ejensi, ketuai komuniti, ketuai bansa sereta organisasyen di menua tu udah nyereta program tu.
Mayuh mahcam aktiviti diatur lebuh program tu entara nya sesi meri licha enggau meri penerang pengerai, aktiviti 'Walk A Mile', beperesa pengerai, program meri darah, sukaneka enggau mayuh agi ti diatur pengelama dua hari program nya berengkah 21 Julai nyin kemari.