Ngambika ulih nentuka pengawa pemansang ti dilangkar ulih dipejalaika enggau manah, bantu pengelantang pendiau ulih diberi lengkas
"Enggau tu, nya deka terus mantu ngelancharka pengawa pemansang ti udah dilangkar lalu ulih nentuka nama pan gaya bantu pengelantang pendiau ulih diberi enggau lengkas,"
Lo Khere Chiang
ADUN Batu Kitang
KUCHING: Gerempung ukai dikuasa perintah (NGO) di nengeri tu patut seruran ngaul kerejasama ti rat enggau perintah ke enda ngira penemu politik.
Kaban Kunsil Nengeri (ADUN) Batu Kitang Lo Khere Chiang madah, tu beguna laban gerempung tu megai tanggungpengawa nyadi jematan entara peranak enggau perintah kelimpah nyungkak dalam pemansang genturung pendiau.
"Aku deka mesan ngagai tetiap NGO ke bisi kelebih agi di Kampung Haji Baki ngambika meri kerejasama ti manah enggau perintah sereta proaktif agi dalam tanggungpengawa sida ngagai komuniti.
"Enggau tu, nya deka terus mantu ngelancharka pengawa pemansang ti udah dilangkar lalu ulih nentuka nama pan gaya bantu pengelantang pendiau ulih diberi enggau lengkas," ku iya.
Iya madah munyi nya lebuh ti bejadi pengerami Nutup Program Ngintu Pengelantang Pendiau Tanggungpengawa Begulai enggau NGO di Masjid Darul Ehsan, Kampung Haji Baki ditu, kena Hari Minggu tu tadi.
Sama bisi datai ba pengerami tu iya nya Sekretari Politik Premier Sarawak Tan Kai sereta temuai dipebasa ke bukai.
Bekaul enggau program tu, ku Lo madah, nya diatur Gerempung Pengintu Pengelantang Pendiau enggau Main Asal Kampung Haji Baki enggau Komiti Masjid Darul Ehsan Kampung Haji Baki.
"Beserimbai enggau tu, aku chukup temegah ati ngagai inisiatif ti diatur laban tu iya nya siti program ti ngembuan pemaik ungkup peranak di genturung pendiau nya.
"Ngarapka program tu ulih ngadaka komuniti ti siru ke pengelantang pendiau lalu pia mega, mantu peranak kelebih agi sida ti kurang benasit manah," ku iya.
Urung 130 pesereta nyengkaum peranak genturung pendiau sereta nembiak sekula ari Sekula Primari (SK) Kampung Haji Baki nyereta program tu pengelama dua hari berengkah 23 Julai nyin tadi.