MIRI: Bulan Sabit Merah Malaysia (BSMM) Pampang Sarawak ngelangkar deka ngengkahka sistem ' Sanitasi dan Kebersihan Air Kecemasan' (eWASH) ba sekeda palan strategik di selampur nengeri, dikena mantu lebuh rayat ti betapi enggau penanggul tauka krisis ai.
Sapit Menteri Pemansang Orang Indu, Nembiak Mit enggau Pengelantang Komuniti I (Orang Indu enggau Pemansang Nembiak Mit) Datuk Rosey Yunus madah sistem tu iya nya deka mantu rayat nyema sida betapi enggau krisis ai beresi sereta bisi penusah ngenyit ti nyadi, ti ngaul pengawa ngena ai beresi, di selampur nengeri.
"Sistem tu deka dikena maya ti betapi enggau penusah ngenyit ke alai nadai bekal ai kelebih agi di kandang menua pesisir sereta mega di kandang mengeri ti bisi krisis ai, baka ti nyadi di Miri bedau lama ti udah.
"BSMM Sarawak udah ngaga pengawa manah lalu aku ngarapka mayuh agi gerempung ukai dikuasa perintah (NGO) sereta raban ti bisi pemerat deka mansang nyukung program tu," ku iya madah ngagai media lebuh ti ditemu pengudah bejadika pengerami nutup Program Latig eWASH BSMM Pampang Sarawak di Kompleks BSMM Miri ditu kemari.
Sistem eWASH tu iya nya sistem ngaslka ai beresi ti ulih mindah kin kitu lalu raban BSMM Sarawak ulih mai sistem tu ngagai sebarang palan di selampur nengeri tu.
Rosey ti mega Kaban Kunsil Nengeri (ADUN) Bekenu meda program tu bansa tu nyadika chara ti holistik dalam mantu rayat lebuh ti kena penusah ngenyit.
Dulu ari nya, dalam jaku pengelalu Rosey ti ngarika Menteri Pemansang Orang Indu, Nembiak Mit enggau Pengelantang Komuniti Dato' Sri Fatimah Abdullah madahka kelai ti ngayanka iya nya bisi penambah senentang servis ai irup tauka sanitasyen ke diatur enggau likun baka ai paip beresitauak pengawa nyambung tangki enggau ai beresi ulih ngangkatka pengerai enggau manah ti ngurangka risiko penyakit pedis perut sereta kes pemati.
"Nyadika timbal ngagai pengawa mutarka penusah ngenyit, tu iya nya pengelandik BSMM, lebuh renggat kritikal penusah ngenyit ulih diputarka, peranak ti tekeruga begunaka bantu dikena mualika pemanah pengidup ngagai normal.
"Maya tu mih penumbuh eWASH ti endang beguna dalam mantu rayat kitai gerai ari krisis ti nuntung sida. eWASH iya nya akronim tauka jaku pandak ngagai 'Kecemasan Air Sanitasi dan Promosi Kebersihan' lalu tiga komponen besai iya nya bekal ai, sanitasyen enggau pemeresi," ku iya.
"Ngarika raban Opis Menteri, aku deka meri besai pengaga ati ngagai semua fasilitator enggau pesereta dalam nembuka program latih eWASH ti intensif, ngembuan penerang sereta praktikal tu.
"Aku ngarapka pengudah latih ti terit tu, kita deka ngubah nama ti udah dipelajar nya nyadika pengawa ti dikemeran. Aku deka meda iya nya kita semua ulih meri peransang, motivasyen sereta ulih ngasuh opis korporat, raban ti bekaul enggau bakih kunsi pechaya pengawa BSMM dalam ngaul diri enggau BSMM Sarawak dikena nyukung aktiviti pemansang enggau intervensyen eWASH," ku iya nambah.
Rosey mega ngarapka BSMM Sarawak ulih ngemansangka sektor eWASH nyadika kereban dikena nyukung program promosyen pengerai dalam timbal ti ukai penanggul ngenyit.
Dalam pengerami ti sama, Rosey udah madahka pemeri dua set sistem eWASH ti tiap siti nya beungkus RM35,000 ngagai BSMM Sarawak, nyadika kelai meri sukung opis menteri tu bekaul program nya.
Beserimbai enggau tu mega, program latih Promosyen eWASH iya nya ti keterubah diatur BSMM Sarawak lalu udah dipejalaika ari 22 nyentuk 25 Julai 2022 lalu tu udah diatur BSMM Pampang Miri.
Batang tuju tu iya nya dikena nyendiaka kapasiti volunteer enggau pengereja pengawa dikena bejalaika eWASH dalam sebarang penusah ngenyit ba endur ti bisi krisis ai tauka sanitasyen lebuh ti dituntung penusah ngenyit.
Tu iya nya mandat tauka pemendar Gerempung lalu seriris enggau Polisi Pemun siruka mensia Pergerakan Palang Merah Antarabangsa (IFRC) dalam ngelempungka pemerinsa mensia lebuh ti dituntung krisis tauka penusah ngenyit.
Latih tu mega ngemeratka ngagai promosyen pemeresi laban nya endang beguna dikena nentuka peranak ti kena keruga tu nemu risiko kelebih agi senentang pengerai mensia mayuh lalu ulih ngemeranka pemeresi ti likun sereta mega dikena pengawa nguna ti maksimum enggau pemaik perengkaguna sereta servis eWASH.
Bisi 23 iku pesereta ari mayuh macham Pampang BSMM selampur Sarawak nyereta latih nya ti udah diatur raban fasilitator ti betuaika Pemesai Kanan eWASH IFRC Wendy Neoh lalu disukung raban fasilitator eWASH menua ari indu opis BSMM Menua.
Sama bisi datai iya nya Pengatur Kus ti mega Mandal Chairman 1 BSMM Pampang Sarawak John Lam.