Anda di sini

Program RSK udah diatur di Rumah Panjang Elizabeth Payong Jakong, Balingian

Advertisement

MUKAH: Siti Program Randau Solidariti Komuniti (RSK) Pelilih Menua Mukah 2022 udah diatur di Rumah Panjai (RH) Elizabeth Payong Jakong, Balingian kena Hari Enam, 23 Julai 2022.

Program nya udah diatur pengelama sehari berengkah ari muakka pagi lalu ditangkanka enggau mayuh aktiviti dalam ngatur program ti meri pemaik nya.

Program tu iya nya siti ari chara nerenakka pemereti ati nengah chara 'roadshow' lalu advokasyen ti deka nentuka penyerakup entara komuniti di Sarawak ngambika pengelantang rama terus tegap.

Kelimpah ari nya, tu mega dikena ngerapitka kaul enggau kolaborasi dalam komuniti dikena mutarka penanggul isu rama ti ditapi ngambika pengelikun mensia mayuh terus dijaga.

Program tu mega nyadika chara kena ngenegapka budaya siru komuniti ngambika integrasyen enggau pengelantang rama entara komuniti ulih dikaul.

Yaakub (bediri, lapan kanan) begulai enggau bala bukai lebuh ti beambar pengudah tembu program tu.
Yaakub (bediri, lapan kanan) begulai enggau bala bukai lebuh ti beambar pengudah tembu program tu.

Maya 2019, program RSK udah diatur di Kampung (Kg) Petanak Mukah ditangkanka di Kg Tellian kena taun 2020 lalu datai baru ngagai Kg Petanak dalam taun 2021.

Nitih ku Kaban Kunsil Nengeri (ADUN) Balingian Abdul Yakub Arbi, entara empas program tu iya nya ngenegapka komuniti, beserakup enggau pemansang ti seriris enggau ekonomi sereta fizikal ulih dikemansangka dalam gaya rama ti lantang, manah sereta likun.

"Tu iya nya juluk perintah nengeri datai ba taun 2030 iya nya nyapai status nengeri maju enggau sebela ke alai nadai siku pan tinggal," ku iya dalam jaku pengelalu lebuh pengerami nangguh nya kena Hari Enam tu tadi.

Tetiap individu enggau ruang bilik chukup beguna ngagai perintah lalu tu iya nya tanggungpengawa perintah ngambika sida ulih berubah nyadi positif agi lalu bejalaika ubah dalam idup sida.

Bekaul raban ti ditagit program, tu ngaul penyereta entara peranak Kumpulan Rukun Tetangga (KRT) ti udah dipilih.

Tu iya nya mungkur apai indai, orang indu enggau lelaki ti udah besai tuai, raban nembiak sereta mega nembiak sekula.

Tu mega sama ngaul raban komiti pemansang enggau pengelikun genturung pendiau sereta gerempung ukai dikuasa perintah (NGO) tauka serakup di kandang menua nya.

Semua nya, program tu ulih ngayanka pengeransing megai tanggungpengawa enggau chara kolektif sereta ngenanka penyerakup di Pelilih Menua Mukah kelebih agi di Sarawk.

Sama bisi datai iya nya Sapit Residen Mukah Shafrie Saili enggau Pemangku Pemesai Opis Pelilih Menua Mukah Peleadzman Ahip.

Advertisement