Anda di sini

Hari Sarawak ditukuka kena meri penyedar bekaul pemesai hak Sarawak

Advertisement

SIBU: Pengawa ngenukuka Hari Sarawak udah ngadaka pemereti ati bekaul pemerat Sarawak ti nyadi entiti politik dalam ngempung rayat Sarawak.

Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah madah, Niang Pehin Sri Adenan Satem udah ngenukuka 22 Julai nyadi Kemisi Hari Besai maya 2016, juluk tu iya nya dikena nentuka rayat Sarawak ngenang pemendar enggau pengeransing ketuai suba ti udah nentuka Sarawak merdeka.

"Kena 22 Julai 1963, Gabenor Sir Alexander Waddell madahka pengawa megai perintah kediri ungkup Sarawak lalu nyuaka ngagai Majlis Tertinggi Sarawak. Dalam konteks tu, pengawa ngenukuka Hari Sarawak endang beguna lalu udah meri impak politik, pengawa administrasyen enggau rama ti endang beguna ngagai rayat Sarawak," ku iya.

Iya madah munyi nya ba pengerami ngintu Hari Sarawak 2022 di Stadium Tertutup Sibu, bedau lama ti udah.

Ku Fatimah madah, Hari Sarawak tu mega dikena ngangkatka tikas pemereti ati bekaul pengeransing raban ketuai ke suba ngagai bala nembiak rebak baru.

Iya ti mega Menteri ti Megai Tanggungpengawa ungkup program tu madah, tema 'Sarawak Makmur' dipilih dikena ngayanka tikas enggau gaya pemansang di Sarawak.

Ku iya madah, pemansang terus dipejalaika enggau chakah di selampur nengeri di kandang mengeri, menua pesisir, menua ulu, pantai enggau tanah tinggi.

"Momentum tu nyata meruan berengkah ari Datuk Stephen Kalong Ningkan ngagai Datuk Penghulu Tawi Sli, Tun Abdul Rahman Ya'kub, Tun Pehin Sri Abdul Taib Mahmud ditangkanka Niang Tok Nan lalu diatu Datuk Patinggi Tan Sri Abang Johari (Tun Openg)," ku iya.

Iya mega madahka, bisi pemansang dalam mayuh macham bidang baka penerang, infrastruktur, pemansang pengereja pengawa enggau pelajar.

Ku iya, tu dikena ngangkatka tikas kualiti idup peranak Sarawak kelebih agi di kandang menua pesisir.

Di Sibu, ku iya, pengawa numbuhka Universiti Teknologi Sarawak (UTS) chukup beguna ukai semina ungkup Sibu, tang mega ungkup Kandang Menua Tengah.

Iya bisi madahka, pengawa perintah ti ngangkatmanah Padang Bilun Sibu enggau ungkus RM130 juta udah ngubah landskap di Sibu, ti nyadika nya siti ari palan dangang ti maju di Sarawak.

"Premier kitai mega udah mayuh meri penemu baru dikena ngelengkaska tikas penyakah pemansang di Sarawak baka Pelin Pemansang Baru Bukit Assek, taja tu dipejalaika bisi ngena timpuh ti lama deka tembu.

"Kami dipadahka iya nya pemansang Taman Bishan Ang Mo Kio di Singapura deka dikena nyadi model Pelin Pemansang Baru Bukit Assek ti mekuh ngagai konsep pemansang landskap mengeri enggau pengawa ngatur ai,î ku iya.

Iya pechaya, pengudah tu tembu ila, nya deka nyadi kelai bari di Sibu.

Iya mega pechaya sukung enggau kerejasama ari semua raban ti bisi pemerat endang diguna dalam nentuka politik ti sebela enggau pengelantang rama main asal di nengeri tu.

Beserimbai enggau nya, bisi 1,200 iku udah datai ngulu pengerami tu bedau lama ti udah.

Pengerami tu mega udah digulu Tuai Pemegai Menua Tun Pehin Sri Abdul Taib Mahmud enggau bini Toh Puan Datuk Patinggi Ragad Kurdi Taib sereta Premier Sarawak Datuk Patinggi Tan Sri Abang Johari Tun Openg sereta bini Puan Sri Datuk Amar Juma'ani Tuanku Bujang.

Advertisement