SIBU: Gabungan Parti Sarawak (GPS) nadai bisi isu sekalika Pengawa Bepilih Besai Ke-15 (PRU15) diatur taun tu tauka taun nyin ila laban GPS seruran besedia ngagai pengawa bepilih, ku Dato Sri Abdul Karim Rahman Hamzah.
Menteri Nembiak, Lumba enggau Main enggau Pemansang Orang Dagang nya madah, raban bekimpin pengawa bepilih GPS baru aja udah Pengawa Bepilih Nengeri (PRN) taun nyin kemari.
Iya ditanya sekalika maya PRU15 tu beguna ngagai GPS berindik ari penerang Sapit Chairman Barisan Nasional (BN) Datuk Seri Mohamad Hasan madahka timpuh ti pemadu manah dalam ngatur PRU ke deka datai iya nya kena bulan Oktober tauka pun November.
"Kemaya ñ enda tentu berat ngagai kami. Ukai deka madah diri sumbung iya nya kitai deka menang enggau manah, tang kitai ulih ngasaika kedap jantung rayat. Kitai kala ngasai sebedau tu, (maya) PRN nyin kemari.
"Aku mega ngasaika nya diatu kelebih agi lebuh kitai ngintu Hari Sarawak, kitai ngasaika iya nya orang Sarawak sekalika China, Dayak, Melayu, Melanau kitai semua selubang sepenamu. Kami ngasaika chuku pengaga ati ñ 'Siti Sarawak' ñ asai baka tu selalu nya deka dibantaika dalam undi mega," ku Abdul Karim.
Iya madah munyi nya ngagai pengarang berita pengudah bejadika 'Kejohanan Sukan Ekstrem MYSED' di Gelanggang SAYS di Dataran Tun Tuanku Bujang Fasa II ditu, kemari.
Sama bisi datai iya nya Sapit Menteri Nembiak, Lumba enggau Main enggau Pemansang Orang Dagang Dato Gerald Rentap Jabu, Pemangku Sekretari Mendam Opis Menteri Nembiak,
Lumba enggau Main enggau Pemansang Orang Dagang Nancy Jolhi, Presiden Gerempung Sukan Ekstrim Sarawak (SESA) Nih Mohd Suhaily Bahari enggau Sekretari Politik Premier Sarawak Sayed Azmee Wan Junaidi.
Bejaku bekaul enggau pekara nya, Abdul Karim madahka hari bulan PRU tu endang pekara ti nyadi pemerat Menteri Besai enggau Yang di-Pertuan Agong.
"Udah tentu ti diberi tanggungpengawa tu mayuh utai deka dikira ñ gaya mua hari, (enggau) sekalika Komiti Pengawa Bepilih udah besedia deka ngatur di selampur menua laban nya ukai baka ngatur pengawa bepilih mit.
"Tu deka nyadi pengawa bepilih di selampur menua. Tu mega deka ngena mayuh kerejasama sekalika ari raban polis besedia ungkup pengawa nya, pemesai pengawa bepilih udah diberi latih ñ semua nya patut diperundingka," ku iya nerang.
Nyadika rikod, penggal Parlimen ke diatu deka abis taun nyin ila lalu PRU sebedau tu udah diatur kena 9 Mei 2018.
Abdul Karim madah, PRU ti deka datai mesti diatur dalam timpuh 60 hari pengudah abis penggal Parlimen ke diatu.
"Tu mesti diatur dalam timpuh Julai tauka Ogos taun nyin ila.
Tang selalu nya, sapa aja bagi perintah, sida enda nganti nyau deka datai ba timpuh ti serekat.
"Sida deka ngatu pengawa bepilih nyangka setaun sebedau tauka enam bulan sebedau (abis penggal Parlimen). Nya alai, ulih nyadi ujung taun tu, tauka ulih mega pun taun nyin ila," ku iya.
Iya nandu baru madahka, di Sarawak, GPS deka seruran besedia pengudah baru aja PRN taun nyin kemari.
"Kommiti bekimpin kitai udah chukup minyak. Kelimpah ari nya, SPR (Komiti Pengawa Bepilih) di Sarawak, aku pechaya udah nengah proses tu taun nyin kemari. Nya alai sida udah chukup besedia. Kita ulih nguna orang ti sama ngatur pengawa nya, tang kitai enda nemu bakani di Semenanjung Malaysia," ku iya.
Mohamad Hasan ti suah agi dikumbai Tok Mat madahka, enggau ngautr PRU15 ba bulan nya ulih diatur pengawa mantaika bajet tumu agi.
Iya pengudah nya bisi madahka, pengudah bajet dibantaika, Parlimen ulih direra lalu PRU15 ulih diatur dlaam timpuh sebulan setengah, urung pun nyentuk tengan bulan November.