SARIKEI: Kaban opis kaunsil, bala kunsilor, dilalau ngambika meri servis ti pemadu manah ngagai komuniti seraya bejalaika tanggungpengawa enggau lurus ati.
Kaban Kunsil Nengeri (ADUN) Repok Dato Sri Huang Tiong Sii madah, servis ti chukup komited tu endang beguna dalam nentuka rayat seruran puas ati enggau kualiti servis ti diberika raban tu.
"Kitai ngarapka raban tu deka terus megai sereta ransing enggau runding ti ulih bekerejasama pia mega nyukung polisi perintah iya nya Strategi Pemansang Pengudah COVID-19 (PCDS) 2030.
"Nya alai, kaban ba opis kaunsil ukai semina nyadi jematan entara perintah tauka opis kaunsil enggau rayat tang nyadika penyungkak ngambika isu di renggat baruh ulih diputarka enggau manah dalam pengeransing Ruang Bilik Malaysia," ku Huang.
Iya madah munyi nya ba Pengerami Ngangkat Sumpah Nyiri Baru Kaban Opis Kaunsil PBT Sarawak, Opis Kaunsil Pelilih Menua Sarikei (MDS), lemai kilah ensana.
Pengerami tu udah diatur ba Bilik Aum MDS lalu udah disereta bala kaban opis kaunsil.
Dalam pengerami tu, semua kunsilor ti bekaul udah disambung tipuh bejalaika servis ungkup enam bulan agi iya nya nyentuk 31 Disember 2022.
Pia mega, Huang udah madahka besai pengaga ati ngagai Opis Kaunsil Pelilih Menua Sarikei ti udah mantaika tikas gawa ke chukup manah enggau ngangkatka nama Opis Kaunsil Pelilih Menua Sarikei laban ti udah bulih Kumpulan Inovatif dan Kreatif (KIK), baka Kumpulan VISION 6, INVENTO seretaTR Evolution.
"Ti pemadu ngandalka kitai iya nya Tim Vision 6 ti udah nyereta Pekit International Convention on Quality Control Circle (ICQCC), Taun 2021 renggat antarabansa ti diatur nengah chara 'online' di Hyderabad, India.
"Taja pan maya timpuh pandemik COVID-19 udah ngeregau selammpur dunya, tang tim tu tetap bulih ngaga enggau pemadu manah ti ngaga pengawa mantaika projek tu ke dikumbai NEMOSYS nengah chara online lalu bulih PAR EXCELLENT Award," ku Huang madah.
Beserimbai enggau nya, CHairman MDS Wong Zee Yeng nengah jaku pengelalu iya ba pengerami tu madah, di sitak nya bisi 32 iku kaban opis kaunsil ti datai ari pengeari komponen PArti Gabungan Sarawak (GPS).
Ku iya nambah, dikena ngemuntangka pengawa ngatur pengerami, sida udah numbuhka 7 Komiti Mendam ti deka ngatur aum nitihka timpuh ti udah diatur lalu Kaban Opis Kaunsil mega dibagika nitihka Zon ke bisi 16 Zon semua nya.
"Kitai nemu sereta ngaku tanggungpengawa kaban opis kaunsil endang mayuh penguji deka dipejalaika nama agi timpuh servis ti pandak, tang servis enda ulih disukat tauka ditaka enggau faktor timpuh.
"Servis ti bisi kualiti ngagai komuniti deka meruan diangkat sereta diingat taja semina meri servis pengelama sepenggal.
"Kebuah pia, Kaban Opis Kaunsil udah ngatur enggau pemadu manah taja betapi enggau penanggul kenyau dua taun ti udah pengudah betapu enggau pandemik COVID-19," ku Wong nambah.
Sama bisi datai ba pengerami tu iya nya Sekretari MDS Sait Enggang, Sapit Chairman MDS Misiah Abu Seman enggau staf MDS ke bukai.