Anda di sini

Sarawak bisi peluang ngasilka baja ti ngena arang batu

Advertisement
Dr Rundi nyepi jus nenas ti diasil sereta dipandangka ba palan pemansang nyerumba program Agroinvest MARDI 2022. Nyempulang iya Mohamad Zabawi (kiba) enggau Edwin, kemari. -Gambar Penerangan
Dr Rundi nyepi jus nenas ti diasil sereta dipandangka ba palan pemansang nyerumba program Agroinvest MARDI 2022. Nyempulang iya Mohamad Zabawi (kiba) enggau Edwin, kemari. -Gambar Penerangan

KUCHING: Sarawak bisi peluang ngasil tauka ngemansangka siti inovasyen Nitrohumic Acid (NHA) iya nya teknologi formulasyen baja ai enggau kondisioner tanah ti ngena arang batu dalam pengawa betanam betupi.

Menteri Betanam Betupi Moden enggau Pemansang Kandang Menua (MANRED), Dato Sri Dr. Stephen Rundi Utom madahka, ba negeri tu iya nya di Mukah bisi arang batu ke ulih dikena ungkup inovasyen tu.

Iya arap bendar teknologi baru nya ulih mutarka penanggul bekaul enggau isu baja ke ditapi orang betanam bekebun.

"Baka dipadah ngagai aku sida MARDI (Palan Pemansik enggau Pemansang Betanam Betupi Malaysia) udah ngemansangka siti inovasyen Nitrohumic Acis (NHA) iya nya teknologi formulasyen baja ai enggau kondisioner tanah ngena arang batu ke mayuh ulih ditemu di negeri tu, baka di Mukah.

"Mukah bisi mayuh arang batu. Sida begunaka arang batu ti embap, ba Mukah tu mayuh. Arang batu di Kapit nya rangkai semina setipak kena ngidupka energi. Terima kasih ngagai MARDI ke udah meri kitai penemu, ari kitai ti terus bepanggai ngagai barang mata ari Kanada, Ukrain enggau ke bukai ti mar amat (kena ngaga baja urea).

"Baja ditu udah balat kritikal diatu, kitai deka nguji nyingkang sepengelengkas ke ulih, taja pia dalam setaun tu engka kitai enda ulih tang dua tiga taun agi engka kitai ulih ngurangka rega baja ngena kombinasi chara lama tauka asal ditambah enggau chara baru ke dikembuan kitai," ku iya lebuh dikerandau raban pengarang berita ba aum pengarang berita ditu, kemari.

Dulu ari nya Dr. Rundi bejadika Agroinvest Sarawak 2022 ke diatur MARDI ba sebuah hotel ditu.

Bejaku baru iya madahka ukai semina arang batu tang negeri tu ulih nyerungkai mayuh agi utai bukai ke ulih digaga tauka diasilka ngena inovasyen baru nyadi baja baka biomass, barang ke dibuai enggau ke bukai.

Kelimpah ari nya bekaul enggau bantu subsidi, iya madahka, subsidi nya amat ulih mantu orang ti amat begunaka bantu nya.

Ambika chunto ku iya baja lada, bantu nya diberi ngagai semua pekebun tang bisi sekeda pekebun enda begunaka bantu baja nya ti ngujungka baja nya tebasau sereta bantu enda datai ba pekara ke ditagit.

Nya alai diatu ku iya opis menteri tauka opis ti bekaul deka nanya nama bantu ti dikedeka tauka diguna orang betanam betupi dibandingka sebedau tu bansa bantu nya ditentuka ulih opis ti bekaul.

"Sida ke begunaka bantu nyengkaum orang berikan, kitai enda ulih bepanggai ngagai insentif input tang kitai mesti berubah ngagai insentif output ti bepelasarka perfomance.

"Mayuh agi produk diasilak, deka mayuh agi bantu diterima nuan. Nya deka meri motovasi ngagai orang betanam betupi ngasailka mayuh produk sida.

"Enti nuan majak meri subsidi..reti iya kitai berunding nama ke diguna sida , diatu maya iya kitai nerima penerang tauka timbal ari sida bekaul nama ke diguna sida nama bansa bantu ke diguna sida, udah nya baru kitai meri sida bantu,' ku iya.

Sama bisi datai Seretari Mendam MANRED Datu Edwin Abid enggau  Ketuai Direktor MARDI Dato Dr. Mohamad Zabawi Abdul Ghani sereta sida ke bukai.
 

  • oleh
  • Advertisement