BINTULU: Palan penyangkai kapal tasik dalam patut diangkatmanah lalu palan penyangkai kapal baru patut digaga nyema Sarawak deka nyadi sebuah nengeri mansang dalam taun 2030.
Sapit Menteri Infrastruktur enggau Pemansang Palan Penyangkai Kapal Sarawak Dato Majang Renggi madah, ukai semina patut ngangkatmanah palan penyangkai kapal, nengeri tu mega patut nyapai tikas penumbuh Pemansut Kasar Asil Dalam Menua (KDNK) enam nyentuk lapan peratus setaun nyentuk taun 2030 dikena nyapai sebuah nengeri mansang.
Ku iya, perintah udah ngaga mayuh jalai alun, infrastruktur bukai tang kapasiti palanpenyangkai kapal patut diangkatmanah berindik ari diatu perengkaguna palan penyangkai kapal ke udah bisi enda ulih nangkup guna kargo tama pansut ke nengeri tu.
"Kitai udah ngelawa sekeda palan penyangkai kapal di menua mansang dikena bkunsi, bekerejasama enggau mantu kitai dalam pemansang palan penyangkai kapal di nengeri tu.
"Sapit Premier Sarawak ti mega Menteri Infrastruktur enggau Pemansang Palan Penyangkai Kapal Datuk Amar Douglas Uggah Embas mega udah ngatur aum enggau raban pengatur palan penyangkai kapal di Belgium bekaul enggau chara dikena ngemansangka palan penyangkai kapal tasik dalam di Kuching," ku iya lebuh ti bejadika Pengerami Ngintu Hari Pengajar, Silih Budaya (Hari Gawai enggau Hari Raya) sereta Pengawa Nyuaka Projek Program Transformasyen Menua Pesisir (RTP) di Sekula Primari (SK) Kidurong ditu, kemari.
Nya alai, ku iya, raban sida udah ngatur aum di Kuching ke alai perambu dekangaga palan penyagkai kapal tasik dalam di Tanjong Po tang kandang endur nya ngembuan pun bakau ke patut dijaga.
Beratika gaya nya, ku iya, perintah merambu mindahka endur ngaga nya di Tanjung Mang di Kuching ke lalu bekerejasama bekaul enggau chara deka ngemansangka palan penyangkai kapal ti baru nya.
Pia mega, Majang madahka, raban sida udahmai pengari Palan Penyangkai Kapal Rotterdam ari Eropah ke Palan Penyangkai Kapal Samaaju dalam bekrejasama kena ngangkatmanah Palan Penyangkai Kapal Samalaju nyadi palan penyangkai kapal ti besai.
Ku iya, tu iya nya juluk perintah kitai dalam ngemansangka nengeri Sarawak nyadi nengeri mansang ti ngemeratka guna pemeranak puku bekaul pemerat politik ti sebela, perengkaguna kuasa elekterik ti chukup enggau perengkaguna palan penyangkai kapal ti ulih nangkup barang kargo tama pansut ke nengeri tu.
"Gaya tu ti patut kitai peda enggau kapasiti palan penyangkai kapal ti patut diangkatka kitai," ku iya ti mega Kaban Kunsil Nengeri (ADUN) Samalaju.