BINTULU: Palan Sarawak ti manah sereta tegap ngemudahka perintah Sarawak bejalaika pelin pemansang enggau manah agi kelebih agi Pelin Bejalaika Pengawa Strategi Pemansang Pengudah COVID-19 (PCDS) 2030 ti nentuka nengeri tu nyadi nengeri mansang datai ba taun 2030.
Sapit Menteri Infrastruktur enggau Pemansang Palan Penyangkai Kapal Dato Majang Renggi madah, setipak enggau Bintulu ti deka betapi enggau pemansang ti chakah kedua pengudah gelumbang keterubah maya 1970-an enggau pun 1980-an.
Ku iya, sekeda projek dipejalaika maya nya nyengkaum ngaga loji gas cecair asli MLNG Satu enggau Dua, palan penyangkai kapal, kaunsil bekal ai, jematan lalu diatu projek ti bisi skala besai enggau tengan pemesai ti benung dipejalaika.
"Bisi ti agi benung dikerandau tauka diperambu deka dikemansang di Zon Industri Kidurong enggau Taman Industri Samalaju ke ngaul pengawa ngaga Loji Sarawak Methanol Petchem enggau penyampau beranakka puku RM3.7 bilion dipelabaka berengkah bejalaika operasyen dalam taun 2024," ku iya.
Iya madah munyi nya lebuh ti bejadi Pengerami Ngintu Hari Pengajar, Silih Budaya (Hari Gawai enggau Hari Raya) sereta Pengawa Nyuaka Projek Program Transformasyen Menua Pesisir (RTP) di Sekula Primari (SK) Kidurong ditu, kemari.
Kelimpah ari nya, ku Majang madah, hub berubat Sarawak enggau penyampau beranakka puku RM1 bilion lalu diatu benung digaga ungkup fasa keterubah ti beungkus RM200 juta, loji hidrogen Sarawak enggau penyampau beranakka puku RM24 bilion dipelabaka deka digaga dalam taun 2023, Malaysia Phosphate Additives Sarawak Sdn Bhd mega benung dipejalaika dipelabak berengkah beoperasyen suku ketiga 2022.
Ku iya, luji besi Wenan enggau penyampau beranakka puku RM13.8 bilion iya nya kilang besi enggau keluli ti pemadu besai di Asia Tenggara lalu ti keterubah di Sarawak mega benung dalam pengawa nyendiaka taba lalu kompeni ti udah bisi ngelangkar dekan ngerembaika tauka ngangkatmanah kilang sida.
Ku iya nerang, tu dikena nambahka kapasiti sereta ngemansutka produk sida, enggau perambu dalam ngaga loji baru ti bepelasarka minyak enggau gis sereta ngaga paip gis ari Tanjung Kidurong nuju ke Taman Industri Samalaju mega sama digaga.
"Pemansang ti chakah ke nyadi di Bintulu kelebih agi di baruh Kunsil Nengeri (DUN) Samalaju udah enggau deka ngadaka mayuh peluang gawa dalam mayuh macham bidang ungkup anak Sarawak," ku Majang ti mega Kaban Kunsil Nengeri (ADUN) Samalaju.
Nya alai, iya ngengkahka pengarap ti tinggi ngagai raban pengajar ngambika terus segulai sejalai enggau apai indai dalam pengawa meransang pengelandik bala anak dikena nentuka penylut pelajar sida dalam bidang akademik.
"Aku pechaya enggau latih sereta akademik ti engkeman kitai semua ulih sama lalu ulih mansang begulai," ku iya seraya meri besai pengaga ati ngagai SK Kidurong ti udah ngembuan palan pejalai kaki ke bisi atap ti digaga nengah RTP enggau ungkup RM180,000.
Iya ngarapka perengkaguna nya ulih meri pemaik enggau pengelantang ngagai raban sekula lebuh ti ujan enggau panas ke lalu madahka perintah komited deka nyendiaka prasarana ti moden agi sereta kondusif seriris enggau peminta enggau guna pelajar jeman baru tu.
Sama bisi datai iya nya Kepala Pengajar SK Kidurong Sintan Lugat, Penulung Pemesai (Sektor Pelin Pemansang) Opis Pelajar Pelilih Menua Bintulu Yusup Harbi, Chairman Kaunsil Kepala Pengajar Bintulu Togang Sedin, Chairman Gerempung Apai Indai enggau Pengajar (PIBG) SK Kidurong Mohammad Zaidi Wan Kadir, Penulung Injinir (Perintah) Opis Kereja Raya (JKR) Bintulu Mary Gorrety Buring Kajan.
Penulung Kanan Administrasyen Abdul Aziz Dahlan, Penulung Kanan Pekara Nembiak Sekula Liza Man, Penulung Kanan Kokurikulum James Duyun enggau Supervisor Lemai Mordiana Mohammed sama mega bisi ngulu program nya.