Dikarang Rengenyan Labang
KUCHING: Penembu rentayan broadband tebuka bepeneras tinggi menua pesisir Sebauh (Sebauh rural high-speeds open broadband network) udah meri pengelantang enggau penguntung ngagai beberapa buah rumah panjai, sekula, institusyen pelajar tinggi ebggau opis perintah di pelilih menua Sebauh.
Premier Sarawak, Datuk Patinggi Tan Sri Abang Johari Tun Openg madahka penyambung enggau infrastruktur digital nya mungkur pengawa ngemesaika kabel fiber optik.
"Perintah Sarawak apin lama udah nembuka rentayan broadband tebuka bepeneras tinggi menua pesisir Sebauh .
"Projek tu mungkur pengawa ngemesaika kabel fiber optik kena nyambung ngagai 49 buah rumah panjai, enam buah sekula, dua buah institusyen pelajar tinggi, enggau tiga opis perintah ba pelilih menua Sebauh," ku iya.
Abang Johari mansutka pekara tu lebuh iya bejadi '5th International Digital Economy Conference Sarawak (IDECS) 2022 ti diatur ba BCCK ditu, kemari.
Dulu ari nya iya madahka strategi perintah Sarawak ngaga infrastruktur digital kena ngerembaika bungkur enggau nyendiaka penyambung,kelebih agi ungkup rayat menua pesisir.
Ku iya, enggau rampa menua Sarawak ti besai, dianggar begunaka 7,000 stuktur telekomunikasyen kena nyapai 99.9 peratus pengerembus internet di selampur Sarawak.
Iya madah, Inisiatif Sarawak Nyambungka Mengeri, Menua Pesisir enggau menua (SALURAN), iya nya inisitaif perintah Sarawak kena nyendiaka penyambung ngagai rayat.
Ari baruh inisiatif SALURAN ku iya, perintah Sarawak ngungkupka menara SMART ti digaga ari baruh projek Sarawak Multimedia Authority Rural Telecommunication (SMART), lalu perintah besai nengah MCMC udah meri ungkup belanja tambah lalu 742 menara baru digaga di Sarawak nengah program National Foberization and Connectivity Plan (JENDELA).
"SMART 600 Fasa 1 ( 300 menara keterubah) ditagit tembu lebuh manggai ba Q3 2022 lalu Fasa 2 (200 menara kedua) lebuh manggai ba Q4 2023," ku iya.
Bejaku baru, iya madahka sebagi ari SALURAN, Sarawak Rural Broadband Network, MySRBN, iya nya rentayan telekomunikasyen broadband bepelasarka 4G enggau 5G ke diempu negeri, keterubah ti ngena teknologi Fixed Wireless Broadband.
Bisi 158 taba di serata Sarawak udah digaga kena nyambung ngagai ruang bilik enggau rayat menua pesisir, ku iya,
"Ba fasa ke deka datai, MySRBN deka dikerembaika ngagai semua infrastruktur SMART 600 enggau juluk kena nyendiaka servis broadband rumah ungkup 100,000 buah rumah menua pesisir dalam beberapa taun ke deka datai.
"Ba kandang menua ti jauh, perintah Sarawak udah nyikap 250 taba ngena Very Small Aperture Terminal (VSAT) ari baruh projek WiFi SALURAN.
"Tu chara mutarka sementara kena meri akses internet ngagai komuniti ke bedau ampit ngena servis nya ti udah nguntungka 86,562 penguna naka ke diatu," ku iya.
Sama bisi ngulu pengerami bejadi IDECS 2022, Sapit Premier Sarawak Datuk Amar Douglas Uggah Embas enggau Dato Sri Dr Sim Kui Hian, Sapit Sekretari Perintah Negeri (Operasyen) ti mega Chairperson IDECS 2022 Datu Dr Sabariah Putit enggau sida ke bukai.