Nya platform ke manah alai ngiga rejeki dagang mikro,ku Uggah
“Tu chara kami (perintah) mdah ngagai orang dagang bansa Dayak bahawa ke alai dagang nya tau dipejalaika belama enda ngira maya lalu ukai semina maya Hari Gawai aja, awakka bisi peluang kena nambahka penatai pemisi."
Datuk Amar Douglas Uggah Embas
Sapit Premier Sarawak
KUCHING: Pengawa ngatur Bazar Festival Gawai meri peluang kelebih agi ngagai orang dagang bansa Dayak ngulihka penatai pemisi nengah chara mantaika produk ke digaga sida.
Sapit Premier Sarawak Datuk Amar Douglas Uggah Embas madah, nya platform ke manah alai ngiga rejeki dagang mikro ke baka nya.
“Tu chara kami (perintah) mdah ngagai orang dagang bansa Dayak bahawa ke alai dagang nya tau dipejalaika belama enda ngira maya lalu ukai semina maya Hari Gawai aja, awakka bisi peluang kena nambahka penatai pemisi.
“Nya kebuah kitai ngatur Bazar Festival Gawai tu ditu, pengelama 10 hari berengkah ari 17 Jun 2022,” ku iya madah maya dirandau media lebuh ngabas Bazar Festival Gawai 2022 ba laman Dewan Mensia Mayuh Majlis Bandaraya Kuching Selatan (MBKS) ditu, malam ensanus.
Ku Uggah, iya temegah ati meda tusun bansal alai bejual ti teratur enggau respons positif ari mensia mayuh ngagai bazar nya.
Ku iya, pengawa ngatur bazar nya diperambu diatur ninting taun ambika mensia mayuh nemu produk negeri tu ke bisi dijual.
“Udah nya ulih matak mayuh temuai nengah chara mandangka barang pemakai asal orang Sarawak,” ku iya.
Ambika chunto, iya udah ngelawa bansa ti bisi nyual sos chabi enggau aiskrim buah dabai.
“Dabai baka selama dibuai kitai igi iya, tang diatu kitai tau makai isi iya (puak igi buah dabai) baka kachang pistasio,” ku iya.
Ku iya baru, bazar ke sekali tu bisi 129 buah bansa bejualka pemakai, ai irup enggau produk asil pengelandik jari.
“Engka deka nambah taun baru bepanggai ba gaya sambut ari mensia mayuh,” ku iya.