Anda di sini

Willie Mongin minta nyemilik PBB

Advertisement
 

KUCHING: Sapit Menteri Industri Ladang enggau Komoditi Datuk Willie Mongin madahka diri udah minta nyemilik Parti Pesaka Bumiputera Bersatu (PBB).

Ku iya, peminta nyemilik parti nya udah dikenataika iya beberapa bulan ke udah.

"Ya, amat. Aku udah ngenataika peminta nyemilik PBB lalu arapka sida nerima peminta aku.

"Ke rikod, enti perintah (besai) berubah, aku enda nyemilik parti politik taja pan endang amat aku milih nyukung perintah tang sida (kperintah ke maya nya) sechara teknikal engkah aku ari baruh BERSATU (Parti Pribumi Bersatu Malaysia). Tu kena nentuka aku bulih mayuh agi sukung ngagai perintah ke diatu," ku iya lebuh dirandau pengarang berita sekalika amat iya udah minta nyemilik PBB.

Iya  madah munyi nya lebuh ke dirandau maya Pengerami Simbolik Penyerahan Faedah Pencen Penakat PERKESO (Gerempung Pengelikun Sosial) ngagai aris ba Kampung Semadang, Jalai Puncak Borneo,urung 38km ari ditu.

Willie ke mega Kaban Parlimen Puncak Borneo madah, iya diatu ngelempaika pekara nya ba Ketuai PBB nentuka status peminta nya.

Ditanya sekalika iya ngembuan pengandal ati diterima nyemilik parti nya, iya nyemetak madahka nya tepulai ngagai ketuai parti ngaga pemutus.

"Ba runding aku,kelalu tumu aku nyaut ngarika sida (PBB)...aku udah nganjung peminta lalu nya bepanggai ba ketuai part, meda pengerurus ati aku gawa ke rayat kelebih agi ba sitak aku empu.

"Enti ba penemu sida aku tu orang ke betul tauka engkeman mai menira sida ba pengawa bepilih besai ke deka datai ngarika rayat di Puncak Borneo, terima kasih, amat gaga amat ati," ku iya.
Berebak enggau nya, Willie ngarapka PBB meri peluang ke patut, laban iya komited bekerejasama ke pemaik peranak di Puncak Borneo enggau rayat Sarawak sereta Malaysia.

Ku iya, taja pan bedau sechara rasmi nye,ilik barang bagi parti politiik, iya tetap nyukung perintah ke diatu lalu meri besai terima kasih ngagai perintah ke diatu laban udah mayuh mantu iya gawa ba sitak iya.

Ku iya baru, iya deka majak gawa ke rayat lalu meri besai terima kasih laban udah meri peluang ngagai iya enggau dalam perintah, ti ngujungka iya ulih mai mayuh pemansang ke Puncak Borneo mnengah mayuh bengkah bantu ti disediaka.

"Aku ngarapka tu ulih dipajakka lalu aku arap amat kami ulih bekerejasama ba platform politik ke sama kena nentuka perintah negeri enggau perintah besai tegap. Negeri enggau menua tau terus maju enti bisi perintah ke tegap," ku iya.


Kawasan Parlimen Puncak Borneo sebeldau tu nyadi kuta kuat PBB ari baruh pegai penyandang iya, niang Datuk Seri Dr James Dawos Mamit sebedau kerusi nya direbut Willie ti bediri minta pilih ngena tiket Parti Keadilan Rakyat (PKR) maya Pengawa Bepilih Besai Ke-14 (PRU-14) dalam taun 2018.

Advertisement