Sebaka enggau ejensi pemansang bukai engagu juluk kena ngaduka pemansang ba kandang menua ti udah ditetapka
"Terima kasih ngagai Premier Sarawak Datuk Patinggi Tan Sri Abang Johari Tun Openg laban udah ngaduka pengawa numbuhka RDDA ti lalu ulih ngaduka pemansang ba kandang menua nya.”
Datu Len Talif Salleh
Sapit Menteri Perambu Mengeri, Pengatur Tanah enggau Rampa Menua
KOTA SAMARAHAN: Pengawa numbuhka koridor pemansang baru Ejensi Pemansang Delta Rajang (RDDA) enggau Ejensi Pemansang Betong nyadi pengenap ngagai 'missing link' pemansang ti digaga diserata Sarawak.
Sapit Menteri Perambu Mengeri,Pengatur Tanah enggau Rampa Menua Datu Len Talif Salleh madah, nya sebaka enggau ejensi pemansang bukai baka Ejensi Pemansang Beserakup Samarahan (IRSDA), Ejensi Pemansang Tanah Tinggi (HDA) enggau ke bukai ti ngembuan juluk kena ngaduka pemansang ba kandang menua ti udah ditetapka.
Ku iya nengah pengawa numbuhka ejensi baru nya, nya deka nyadi pengenap ngagai pemansang 'missing link' ti benung digaga di serata Sarawak.
"Terima kasih ngagai Premier Sarawak Datuk Patinggi Tan Sri Abang Johari Tun Openg laban udah ngaduka pengawa numbuhka RDDA ti lalu ulih ngaduka pemansang ba kandang menua nya.
"Kelimpah ari nya, ari baruh RDDA nya mega deka meri fokus ngagai pemansang infrastruktur baka jalai alaun, ai, elekterik enggau ke bukai," ku iya.
Iya madah munyi nya pengudah Pengerami Nyuaka Gazet Rizab Komunal Bumiputera di Dewan Suarah, ditu kemari.
Len Talif ti dichiri nyadi Chairman RDDA nya madah, nengah pengawa numbuhka RDDA, nya udah tentu ulih ngaduka pemansang perengkaguna ke bukai kelimpah ari pemansang infrastruktur sereta ulih ngerembaika baru aktiviti ekonomi peranak menua nya.
Ku iya, tetiap koridor (ejensi pemansang) ngembuan penyelai pemansang kediri empu sekalika pemansang ba kandang menua tebing tasik, pemansang ba kandang menua tanah tinggi enggau ke bukai.
"Kelimpah ari nya, ejensi nya mega bejalaika pengawa ambika projek pemansang enda besibil enggau projek pemansang ke bukai.
"Kebuah pia laban kitai bisi Kaban Parlimen, kitai bisi Kaban Kunsil Negeri lalu sida bisi projek empu ba sitak sida empu.
"Nya alai, ejensi pemansang koridor ke baka deka bejalaika pengawa ngaduka projek pemansang awakka enda besibil," ku iya.
Berebak enggau nya, Len Talif mega madahka mayuh macham pemar ti ditapi maya ngemansangka sesebengkah sitak baka barang mata, pengereja pengawa ti begunaka timpuh ngemansangka sesebengkah kandang menua.