Anda di sini

Tanggungpengawa pengajar chukup besai reti, ngadaka modal mensia ti menyana

Advertisement
Huang begambar begulai enggau bala pengajar SMK Bandar Sarikei.
Huang begambar begulai enggau bala pengajar SMK Bandar Sarikei.

SARIKEI: Tanggungpengawa siku pengajar ukai semina naka ngajar nulis enggau macha, tang mega ngemansangka menua enggau bansa, pia ku Kaban Kunsil Nengeri (ADUN) Repok Dato Sri Huang Tiong Sii.

Ku iya, pengeransing raban pengajar ti udah meri budi enggau ngajar anak bansa kitai endang chukup besai reti sereta patut dikenang seumur idup.

"Siti ari chara ngagai kitai dalam meri basa enggau terima kasih ngagai bala pengajar iya nya enggau ngatur pengerami ngintu Hari Pengajar ti diatur ninting taun ti endang mayuh nyimpan kenang ti manis bekaul enggau pangku pengawa pengajar ti udah dilempaika tanggungpengawa meri penemu ngagai anak bansa.

"Tu mih siti ari chara tauka pengawa ti pemadu manah ngagai kitai meri awak dikena madahka diri beterima kasih, ngenang basa, enggau bebasaka pengajar ti enda enda ulih tebayar.

"Kemaya hari tu, tanggungpengawa pengajar chukup mayuh penguji enggau ngembuan pengawa ti mayuh. Nya alai, semua renggat komuniti patut meri sukung enggau kerejasama ti rat ngagai raban tu dalam nentuka juluk enggau visyen menua deka ngadaka mayuh agi raban nembiak ti bisi disiplin ke manah sereta mujur dalam semua bidang ti disereta ba tikas ti maksima," ku Huang.

Iya madah munyi nya ba pengerami ngintu Hari Pengajar di Sekula Sekondari (SMK) Bandar Sarikei, ensana.

Pengerami tu udah diatur ba Dewan SMK Bandar Sarikei ti ngaul penyereta bala pengajar sekula nya begulai enggau nembiak sekula.

Nitih ku Huang, kenyau ari iya dipilih nyadi pengari rayat di DUN Repok, sukut pelajar endang dikemeratka lalu seruran nyadika pekara ti keterubah enggau seruran nyadika agenda keterubah dalam pengawa iya.

"Kitai patut beterima kasih laban Premier Sarawak Datuk Patinggi Tan Sri Abang Johari Tun Openg ke ngelama tu chukup siru ngagai pemansang pelajar Sarawak ke lalu mega ngangkatka tikas kualiti pelajar di nengeri tu.

"Bepelasarka rikod raban kitai, SMK Bandar Sarikei udah nerima agih belanja nengah Program Transformasyen Menua Pesisir (RTP) iya nya bisi RM1,526,800 ari taun 2016 nyentukka taun 2021 lalu dalam taun 2022, SMK Bandar Sarikei dalam nerima agih belanja sepenympau RM50,000.

"Semua agih belanja ti udah diagihka tu iya nya dalam mantu ngangkatka perengkaguna sekula ungkup guna semua lalu nentuka bala nembiak enggau bala pengajar ulih ngasaika gaya endur belajar ti manah," ku Huang nerang.

Sama bisi datai iya nya Pemesai Opis Pelajar Pelilih Menua Sarikei Lau Ngie Tung, Prinsipal SMK Bandar Sarikei Omar Shariff enggau Chairman Gerempung Apai Indai enggau Pengajar (PIBG) SMK Bandar Sarikei Lin Wen Kwang.

Advertisement