SIBU: Program Randau Solidariti enggau Forum Begulai Komuniti Sibu Jaya kemari udah nerima sambut ti manah ari bala pesereta.
Program ti diatur Opis Penyerakup Menua enggau Integrasi Nasional (JPNIN) Bagi Menua Sibu udah diatur di Balai Mayuh Guna Sibu Jaya.
Program tu iya nya dikena nerenakka pemereti ati dalam komuniti di kandang menua tu lalu meri pemerat ngagai guna nyaga penyerakup dalam komuniti.
Ejensi Penyalah Gian Dadah Menua (AADK) Pelilih Menua Sibu dikangau dalam ngatur licha bekaul gaya individu ti udah gian dadah.
Peranak Sibu Jaya mega chukup betuah laban sida bisi peluang nemu enggau silik agi bekaul pengelikun mensia mayuh sereta chara nyeliahka penyalah nya nengah licha ti udah diatur raban Polis Diraja Malaysia (PDRM).
Opis Bomba enggau Penyelamat mega end tinggal bekunsika tajuk licha bekaul pengawa mutarka penusah angus sereta mega demonstrasyen madamka api ti ulih nerenakka pemereti ati bekaul enggau guna belajar penemu sereta pengelandik madamka api nyema bisi nyadi penusah angus.
Beserimbai enggau tu, raban PDRM ti diarika DSP Ariffin Bahar enggau ASP Kushairy Bujang ke nyadi kaban panel forum udah bejalaika licha bekaul enggau pengawa nyeliahka bisi kes penyalah.
Sama bisi datai iya nya pengari JPNIN Bagi Menua Sibu, Opis Menteri Pengerai Malaysia (KKM), Opis Pengerejista Bansa (JPN), AADK Pelilih Menua Sibu, Opis Bomba enggau Penyelamat Malaysia (JBPM), Opis Pengintu Pengelantang Pendiau Komuniti (JKM), Opis Kaunsil Kandang Menua Pesisir Sibu (SRDC) sereta Opis Kereja Raya (JKR).