Anda di sini

PJKM udah diatur ba 154 palan, kandang menua di Sarawak

Advertisement

Enggau penyampau dagang nyapai RM4.531 juta sereta pemayuh orang ti datai iya nya 210,206 iku, ku Peter

Peter (kiba) matau rega utai dijual baka telu enggau minyak nyumai maya PJKM di Everrise Metrocity. 
Peter (kiba) matau rega utai dijual baka telu enggau minyak nyumai maya PJKM di Everrise Metrocity. 

“Semanjai bejalaika PJKM, mayuh macham barang ti diguna ninting hari udah dijual enggau rega ti manah nyengkaum barang ti endang diperebutka bala penguna baka manuk, minyak nyumai, gula, tepung enggau sayur,”

Peter J. Berinus Agang
Ketuai Pemesai Penerit Adat KPDNHEP Sarawak 

KUCHING: Program Bejual Ruang Bilik Malaysia (PJKM) udah dipejalaika di 154 buah palan di nengeri tu enggau penyampau dagang udah datai ba penyampau RM4.531 juta lalu bala orang ti datai bisi 210,206 iku.

Ketuai Pemesai Penerit Adat Opis Menteri Dagang Dalam Menua enggau Pekara Penguna (KPDNHEP) Sarawak Peter J. Berinus Agang madah, PJKM dipejalaika enggau sukung sereta kerejasama ari mayuh raban.

Entara nya, Opis Menteri Pekara Wang enggau Opis Menteri Betanam Betupi enggau Industri sereta ejensi bukai baka Opis Dagang Betanam Betupi Perintah Besai, Opis Pemansang Orang Berikan Malaysia enggau mayuh agi ejensi bukai.

“Semua nya bisi lebih ari 240 bakih strategik udah sama ngaul diri dalam ngemujurka PJKM.

“Semanjai bejalaika PJKM, mayuh macham barang ti diguna ninting hari udah dijual enggau rega ti manah nyengkaum barang ti endang diperebutka bala penguna baka manuk, minyak nyumai, gula, tepung enggau sayur,” ku iya.

Iya madah munyi nya lebuh ti bejaku pengudah matau PJKM Renggat DUN Tupong enggau Parlimen Petra Jaya di Everrise Metrocity ditu, kemari.

Ku Peter nambah, kelimpah ari rega ti disediaka bakih strategik, bisi mega pemeri ari Kaban Parlimen sereta Kaban Kunsil Nengeri (ADUN) di sitak nya udah ulih ngurangka rega barang ti disediaka maya PJKM ke murah agi ari rega ngelama tu.

Nya alai, iya ngarapka mayuh agi Kaban Parlimen sereta ADUN perintah enggau penyakal sama begulai lalu meri sukung dalam pengawa ngurangka tating belanja ungkus pengidup rayat.

Bekaul enggau pengawa matau rega manuk, pengudah subsidi ngagai orang ti betupi nya diketuka berengkah 1 Julai, Peter madah raban penerit adat deka terus matau rega.

Pengawa matau ti meruan tu, ku iya, iya nya dikena nentuka nadai bala pedagang ti beambi ulih ngiga untung ti kelalu besai.

Advertisement