MIRI: Kelimpah betapi enggau isu kurang bekal ai mineral di pasar, peranak Miri mega ngambi inisiatif ngena pinggai mangkuk, sudu enggau changkir kertas kelimpah ngena tanchut dalam sekali kena, lebuh ti dituntung penusah krisis bekal ai ti udah lebih ari timpuh 60 jam kenyau ari 16 Jun nyin kemari.
Bekal ai mineral ti majak kurang sereta enggai enda pan nyau kena tagang dijual ngagai penguna, ti nyadika krisis bekal ai ditu majak nyadi kelebih agi ngagai peranak di sitak ti tekeruga.
Mayuh peranak di Miri ti ditanya madahka, sida udah ngiga bekal ai mineral di palan bebelika barang enggau kedai renchit, kenyau dua ari ti udah tang nadai stok agi.
“Ti agi tinggal, nyema bisi pan, bansa ai mineral ti mar lalu dijual nyentukka RM30 sekatun tauka sekutak. Ni nya ulih dibeli agi. Ai mineral ti murah tu, kenyau ari dua hari ti udah, aku enggau laki aku ngiga, nyau deka semua palan bebelika barang enggau kedai di Miri, nadai agi,” pia ku Sia Yen Peng, 50.
Ku iya, baru kemari, sebuah palan bebelika barang di Lutong ti bisi stok ai mineral ke dijual, tang rintai penguna udah panjai nganti di luar, ti ngujungka iya enggau laki pengudah nya pulai enggau jari puang laban ti udah nadai stok agi.
“Berindik ari nya, kemari (ensana) aku enda ulih nyumai laban ti nadai ai, kami sebilik enggai enda pan meli pemakai ari luar (tapau). Gari enda ibuh disebut, tiga hari udah enda dibasu,” ku iya madah ngagai Utusan Borneo lebuh ti ditemu kemari.
“Sehari tu (kemari) aku enggau laki berintai agi ditu, deka ngulihka bekal ai,” ku iya nambah lebuh ti enggau orang bukai nusun tong puang ke diisi, di palan nganjung bekal ai di Desa Murni ditu.
Beserimbai enggau nya, Riti John, 48 enggau menyadi iru, Rosti Suli, 56 minta bantu raban LAKU sereta Opis Bomba enggau Penyelamat (bomba) ditu ngambika nganjung bekal ai beresi ke kandang endur 'flat' di Taman Ceria.
“Kami din ukai semina rami peranak, tang mayuh orang ti enda ulih deka bulih bekal ai beresi kediri laban ti nadai perengka pengangkut dikena mindah, baka aku,” ku Riti.
“Gaya tu dipeda mar agi ungkup indai ti ngandung sereta ngembuan anak mit ke agi nusu. Sida endang begunaka ai. Ai mineral aja enda umbas. Nama agi bisi sekeda nya laki sida gawa di luar pantai (off-shore). Nya alai aku minta ngambika raban ti bekaul nganjung bekal ai ke kandang endur Taman Ceria di Permyjaya ditu,” ku iya.
Ungkup menyadi iru iya, Rosti madahka, peranak Miri berubah nyadi 'orang kaya' enda lama lebuh ti semua ngena barang sekali kena (pakai buang) nyengkaum ngena tanchut dalam sekali kena, laban ti nadai pilih bukai.
“Dekanuchi baju ba Sungai Lutong, bisi jagu, sapa ti berani,” ku iya betundi.
Kededua seduai nya ngena nama pan ti bisi ke ulih dikena ngangkut enggau nimbun ai lalu dibai sama laban nadai ngembuan tong ai ke besai ti sama mega laku baka 'tuchur pisang angat' di jual di pasar.
Ngagai Ajan Imong, 39 enggau Manggang Asin, 66, sida bearap bendar ngambika sida LAKU ngambika ngaga enggau pengabis manah dalam mutarka penanggul bekal ai di Miri.
“Aku kenyau dua hari ti udah, musin pasar Miri, ngiga ai mineral, sebutul pan enda tetemuka. Semua nya abis stok lalu diatu aku enggai enda pan enggau berintai ditu, dikena ngulihka bekal ai.
“Diguna ke jamban, makai ngirup, nya ti pemadu beguna. Enda mandi, baju enda dituchi kenyau berapa hari ti udah, tu agi ulih diterima,” ku Ajan nambah.
Nitih ku iya, rega ai mineral ti dalam botol pan udah enda tentu agi di Miri, bisi ti nyual berega RM12, bisi RM14 nyentukka datai ngagai RM20 sekatun. Tang mensia mayuh enda pedulika rega nya laban ti suntuk begunaka bekal ai.
“Ku orang rega ai mineral udah niki, aku enda nemu pengamai laban aku empu endang nadai peluang meli ai mineral,” ku Manggang nambah.
“Nama ti sama dikearapka iya nya raban ti bekaul, lengkas mutarka pekara tu enggau manah lalu ngiga chara dalam ngujungka krisis bekal ai di Miri tu,” ku iya seraya nambah, mayuh ti tekeruga.
Ari perati Utusan Borneo udah tetemuka, palan ngagih ai beresi dilawa mensia mayuh ari pagi nyentukka malam, pia mega di sekeda kandang endur, rintai mensia mayuh enggau tong sereta butul ai panjai nyentukka sekilo meter.
Tang pengudah nya asa ati, lebuh ti pulai enggau jari puang, laban bekal ai ti diagihka nya abis lalu operasyen nganjung pan diketuka ketegal udah jauh malam.
Enda umbas enggau krisis ti udah bisi, pengawa sekeda raban ti nguji ngelampat rintai mega ngujungka penyarut tang mujur ditagang pengudahbisi raban ti bekuasa datai.
Utusan Borneo mega sama meratika gaya di pasar Miri ti ukai semina meda rak ungkup bekal ai mineral nya puang, tang mensia mayuh ama berintai panjai nganti gintir nuchi gari ba premis dobi ngintu kediri, enggau palan ti enda tekeruga baka di Morsjaya, pasar besai, Taman Tunku digusung mensia mayuh.
Berindik ari nya, Menteri Dagang Temuai, Industri Kreatif enggau Mandangka Seni, ti mega Kaban Kunsil Nengeri (ADUN) Piasau Datuk Sebastian Ting udah nginsil program iya betemu enggau rayat 'walkabout' di sekeda premis pemakai pagi kemari, tang mekuh ngagai pengawa ngagihka ai beresi ngagai peranak ti tekeruga enggau krisis tu.
ADUN Pujut ti mega Datuk Bandar Miri Adam Yii, sama madahka pekara tu kemari, enggau nginsil sekeda program ti sama ke diatur Parti Sa'Ati Rayat Sarawak (SUPP) Pujut-Krokop, dikena mekuh ngagai krisis ai di Miri.
“SUPP Pujut-Krokop ngaga pemutus nginsilka semua aktivti 'walkabout' ke dilangkar sehari tu (kemari), laban kitai deka mekuh ngagai pengawa ngagihka ai beresi ngagai peranak ti tekeruga enggau krisis tu,” ku iya madah dalam WhatsApp begempung (WAG) kemari.