KUCHING: Sarawak dalam timpuh lima taun ke udah mujur ngasaika penguntung ari kuasa autonomi ke endang hak negeri tu.
Sapit Premier Sarawak Datuk Amar Douglas Uggah Embas, ti mega Sapit Presiden Parti Pesaka Bumiputera Bersatu madahka, pekara tauka penguntung nya ulih dipeda enggau nyengenda nengah polisi sereta pemansang ke dipejalaika di negeri tu.
“Dalam timpuh lima taun ke udah, Sarawak udah ngasaika autonomi iya dibandingka enggau sebedau tu.
“Tu nyengenda amat dipeda dalam agenda enggau polisi politik ke digaga, administrasyen enggau pemansang kitai emp uke udah meri penguntung ngagai rayat enggau negeri.
“Penumbuh GPS(Gabungan Parti Sarawak)…Gabungan Parti Sarawak endang chara ti chukup pintar enggau berani. GPS diiring ulih anak Sarawak ungkup Sarawak nyaga hak Sarawak – Intu Sarawak, Jaga Sarawak, tu udah meri awak ngagai kitai negika hak Sarawak nitihka chuan Sarawak,’ ku iya.
Uggah mansutka pekara tu dalam jaku pengelalu ba pengawa pengerami bejadi Aum Besai Parti Pesaka Bumiputera Bersatu (PBB) Sarawak Ke-15 ti diatur ba BCCK ditu, kemari.
Iya ti nyadi chairman komiti besai aum besai tu madahka, dalam timpuh lima taun ke udah, Sarawak udah ngayanka pejalai projek ti jampat, chakah enggau holistic.
“Tu nyengkaum projek-projek infrastruktur baka jalai alun, bekal elektrik enggau ai, jematan (nyengkaum tiga jematan ti dikinsil perintah PH baka Jematan Batang Rambungan, Batang Lupar enggau Batang Igan) enggau projek ke bukai,” ku iya.
Kelimpah ari nya ku Uggah perintah numbuhka lima ejensi pemansang ba kandang endur Koridor Tenaga Diperbaharui Sarawak (SCORE) naka HAD, URDA, NRDA, IRSDA enggau SADA, sereta tiap ejensi tu diungkupka geran pemansang sepenyampau RM1.5 bilion.
Iya madahka Sarawak mujur bejalaika semua pemansang ketegal bisi sumber baka nengah Sales Tax for Crude Oil and Gas, kenyau ari taun 2019 nyentuk diatu Sarawak mujur ngumpul RM8.54 bilion.
Nambah nya Sarawak mega bisi sumber ari Alternatif Funding nengah Bank Pemansang Sarawak (DBOS), sereta DBOS udah ngemendarka belanja sepenyampau RM9.7 bilion dikena bejalaika pemansang di negeri tu, ku iya.
“Dana tu ‘Over and Above’ belanja negeri biasa. Enggau tu, Sarawak ulih ‘accelerate’ tauka ngenyampatka pejalai projek pemansang iya.
“Diatu Perintah Negeri Sarawak benung bebendar ngiga chara pemadu baru kena nambahka sumber dana Sarawak.
“Chara iya, ngubah Undang-Undang Kanun Tanah Negeri enggau Kampung – Carbon Trading enggau Spektrum, lalu tu siti chara barukena nambahka penatai pemisi Sarawak; ngeluarka hidrogen ti nyadi sumber energi baru sereta ba sentang tu kitai chukup diberi basa menua bukai, sereta numbuhka Sovereign enggau ke bukai,” ku iya ti mega Menteri Wang enggau Ekonomi Baru II,” ku iya.
Premier Sarawak ti mega Presiden PBB Datuk Patinggi Tan Sri Abang Johari Tun Openg datai sereta behaji Aum Besai Parti PBB Sarawak Ke-15, sereta sama bisi digulu Sapit Presiden PBB ke mega Menteri Pemansang Mengeri enggau Pengeraja Asal Datuk Amar Awang Tengah Ali Hassan, pemesai PBB kebuai sereta Perwakilan enggau Pemerhari ari semua 82 pampang PBB serata negeri tu.