Anda di sini

Pintu penama Malaysia-Brunei deka dibuka bulan Ogos tu

Advertisement

LIMBANG: Komiti Mutarka Penusah Ngenyit Bagi Menua (JPBB) Limbang, ejensi perintah nyengkaum Opis Imigresyen enggau Kastam patut besedia dalam mutarka isu bekaul enggau penyekut ba pintu penama berindik ari perambu Brunei ti deka muka tauka ngemendarka pemindah ba garis entara menua  nengah jalai darat enggau tasik berengkah pun bulan Ogos ti deka datai.

Sapit Menteri Betanam Betupi Moden enggau Pemansang Kandang Menua Datuk Dr Abdul Rahman Ismail madah, pemutus nya meri empas ti terus ngagai peranak di kandang menua utara Sarawak kelebih agi Limbang, laban endur bagi menua nya ti enda jauh enggau menua sepiak kelimpah ari Miri enggau Sabah.

"Di Limbang kitai mesti sedia ba pintu penama ti ngaul Opis Imigresyen enggau Kastam sereta JPBB Limbang mega patut nyikap diri. Taja COVID-19 majak kurang, kitai patut bejejaga mesti bisi garis lalau (SOP) taja udah ditenduka," ku iya madah ngagai media pengudah Pengerami Bejadi Karnival Lumba enggau Main SABERKAS (KASUS) di Stadium Tertutup Limbang ditu, kemari.

Sama bisi Pemesai Opis Penyerakup Bagi Menua Limbang Mohamad Fakri Asmad, Pemesai Opis Nembiak, Lumba enggau Main Bagi Menua Limbang Yaman Yahya, Supervisor Staidum Tertutup Limbang Abdul Aziz Durahim, Chairman Biro Lumba enggau Main SABERKAS Pampang Bukit Kota Ronny Jumat enggau Mandal Chairman II SABERKAS Pampang Bukit Kota Suhaimi Mohamad.

Ronny (dua kiba) nyuaka tepa ngagai Dr Rahman. Sama bisi dipeda iya nya Suhaimi (kiba), Fakri ( tiga kanan) sereta Yaman (kanan). 
Ronny (dua kiba) nyuaka tepa ngagai Dr Rahman. Sama bisi dipeda iya nya Suhaimi (kiba), Fakri ( tiga kanan) sereta Yaman (kanan). 

Iya ti mega Kaban Kunsil Nengeri (ADUN) Bukit Kota nya madah, kelimpah ari penyekut ba pintu penama, deka mega nyadi penyekut di jalai alun ti patut diputarka lebuh garis entara menua darat enggau tasik nya dibuka ila. 

"Raban ti bekaul kelebih agi polis, kunterikto, Opis Kereja Raya enggau Opis Kaunsil Pelilih Menua Limbang patut besedia ngemuntangka pejalai tauka pemindah enggau numbuhka sekeda prosedur. Endang deka nyadi bisi penyekut jalai tang enda lama ketegal nambah pemayuh entukar di Limbang kelimpah sekeda peranak Limbang mega deka nambah," ku Dr Abdul Rahman.

Ku iya, raban sida ulih mutarka penanggul penyekut jalai berindik ari bisi tanggungpengawa ejensi perintah ti bekaul lalu ngelaluka penatai temuai ari Brunei kena bulan Ogos tu.

Bedau lama ti udah, Menteri di Opis Menteri Besai Brunei enggau Menteri Pekara Wang enggau Ekonomi Dua Dato Seri Setia Dr Awang Mohd Amin Liew Abdullah udah madahka pemindah entara garis menua nengah darat enggau tasik iya nya udah dilangkar ngambika dibuka berengkah kena Hari Satu, 1 Ogos 2022, bepanggai ngagai gaya pengelekai COVID-19 di menua tu enggau ke bukai sereta tikas nyikap diri di pos pintu penama.

"Nya alai, pejalai ti enda tentu berat nengah darat enggau tasik agi enda dikemendar nyentukka Hari Minggu, 31 Julai 2022," ku iya nambah agi.

Advertisement