KUCHING: Kabinet negeri kemari udah ngaga pemutus ba sekeda pekara ti meri penambah ngagai penatai pemisi Sarawak, pia ku Premier Sarawak Datuk Patinggi Tan Sri Abang Johari Tun Openg.
Ku iya, pemutus nya digaga berindik ari aum kabinet ke diatur kemari.
“Aku enggau kabinet udah ngaga pemutus baka sekeda pekara dalam aum kabinet sehari tu (kemari).
“Aku ngasaika nya deka meri penatai pemisi tambah ngagai Sarawak,” ku iya lebuh bejaku maya Ngintu Pengerami Raya-Gawai 2022 ti diatur Opis Premier Sarawak ti digulu Sekretari Peintah Negeri Datuk Amar Jaul Samion ba Kunsil Negeri (DUN) ditu, kemari.
Sama bisi ngulu pengerami dua iku Sapit Premier Datuk Amar Awang Tengah Ali Hassan enggau Dato Sri Dr Sim Kui Hian, Menteri Betanam Betupi Moden engagu Pemansang Kandang Menua Dato Sri Dr Stephen Rundi Utom enggau Speaker DUN Tan Sri Mohd Asfia Awang Nassar.
Taja pia, Abang Johari nadai ngenang baru pasal pekara nya.
Berebak enggau nya, iya mega madahka kerejasama rat entara ketuai negeri enggau pengereja pengawa perintah ulih nyaup perintah ngelala kuing Sarawak pengudah pandemik COVID-19, kelebih agi ba pengawa mulaika pemanah prestasi ekonomi negeri.
Tambah iya, pengereja pengawa perintah negeri ari baruh pegai Jaul udah bebendar gawa maya negeri napi pandemik COVID-19.
“Kami mero terima kasih ngagai pengereja pengawa perintah ari baruh pegai Datuk Amar Jaul ti udah chakah gawa maya kita napi pandemik COVID-19.
“Ketegal kerejasama entara pengereja pengawa perintah enggau ketuai negeri ti manah sereta rat amat maya kitai napi pandemik COVID-19, kitai nemu ngelala kuing negeri pengudah COVID-19 ba pengawa mulaika pemanah prestasi ekonomi,” ku iya.
Ku Abang Johari, antara polisi ti dibantaika iya nya pelin Strategi Pemandang Pengudah COVID-19 (PCDS) 2030 ke deka mai Sarawak nuju era ti lebih nyulut ba taun bukai ke deka datai ila.
“Tu nyaup kitai n gelala sekeda sektor ti patut dikemanahka ti deka meri penguntung ngagai negeri ari sukut asil.
“Ditu mih kerejasama rat entara pengereja pengaw aperintah enggau ketuai negeri ulih nempa situasyen ke manah agi kelebih agi ari perspektif pemansang ekonomi,” ku iya.
Ku iya, tu lalu deka ngubah Sarawak nyadi sebuah negeri ti maju enggau ekonomi bepenatai pemisi ke besai manggai ba taun 2030.
Iya mega ngarapka Sarawak deka majak lantang kemah ila nengah chara berubah nuju ti lebih maju.
Berebak engagu nya, Jaul lebuh ke bejaku ngarapka semua raban perintah negeri terus bekereja nyadi siti tim ti tegap, beserakup, siakr sereta proaktif kena ngemujur misyen enggau visyen perintah Sarawak setipak enggau agenda PCDS 2030 ti benung dipejalaika di Sarawak.
Ku iya, nengah pengerami ti nyadi platform alai betemu, duduk begulai sereta begauk enggau pangan diri, lalu nya mega deka nambahka pemereti ati, bebasaka pangan diri sereta sama nerima pangan diri.
“Pengerami mih maya kitai ngerami sereta ngelakuka pengelikun ba pupu bansa sereta nempa tanggam kaul rama enggau komunikasyen sosial ba kitai, maya kitai nyambut pengabang baka ke dirami kitai sehari tu (kemari).
“Tu siti ari c hara kitai besaup nyapai pemutus ti dikearapka dalam servis pengereja perintah negeri,” ku iya.