BINTULU: Peranak pupu bansa ba bagi menua tu dipinta ngenegapka kaul manah sereta sama bebasaka pangan diri kena nentuka pengelantang enggau pengelikun ba bagi menua enggau negeri tu meruan belama.
Sapit Ketuai Parti Pesaka Bumiputera Bersatu (PBB) Jepak Dato Pengiran Daud Pengiran Putera madah, pupu bansa ke bisi di Bintulu mesti ngenegapka tanggam kaul entara sida enda ngira bansa, budaya enggau jalai pengarap.
Ku iya, sida mega mesti bebasaka pengan diri kena ngena pengelikun ti endang udah bisi ari suba.
Iya bejaku munyi nya lebuh ngulu Pengerami Ngiling Bidai ba Rumah Saong Jelani, Nanga Kemena Kuala Tatau kena Hari Satu tu tadi.
Penatai iya disambut Tuai Rumah Saong enggau Komiti Pemansang enggau Pengelikun Genturung Pendiau (JKKK) Rumah Saong.
Berebak enggau nya Pengiran Daud madah, isu ai beresi ba rumah panjai nya enggau ngelingi Nanga Kemena deka diputarka berindik ari jamin Opis Bekal Ai Menua Pesisir (JBALB) ke deka ngaga pengawa meresi tangki bekal ai di menua enggau naka pengelengkas.
Iya meri terima kasih ngagai Sapit Premier Sarawak Datuk Amar Douglas Unggah Embas, Menteri Utiliti enggau Telekomunikasyen Datuk Julaihi Narawi sereta Kaban Kunsil Negeri Jepak, Datuk Talib Zulpilip ti udah jampat mutarka sebana bekaul enggau pekara nya ti dikenataika peranak menua nya.
Tuai Rumah Saong ngarika peranak rumah panjai nya ngelaluka penatai raban Pengiran Daud ke mega dati bejadi Pengerami Ngiling Bidai sereta begulai enggau peranak rumah panjai nya enggau peranak ti diau ngelingi Nanga Kemena.