Anda di sini

Matapelajar Sivik patut diajar baru ba sekula sekondari

Advertisement

KUCHING: Menteri Nembiak, Lumba enggau Main enggau Pemansang Orang Dagang Sarawak Dato Sri Abdul Karim Rahman Hamzah meri penemu ngambika pekara bekaul penemu sivik nyengkaum pasal pengawa bepilih tauka ngundi patut nyadi silibus ba renggat sekula sekondari.

Iya madahka nya ambika raban nembiak di menua tu lebih meretika nama tanggungpengawa sebedau nyadi pengundi maya umur 18 taun.

Maya Parlimen ngemendarka Rang Undang-undang Undi 18 ku iya, kitai bisi  meri sukung penuh tauka nadai parti ke enda nyukung.

"Ba penemu aku kediri, kitai udah ngaga tu (Undi 18) tu beguai mimit. Kitai patut bisi mayuh chara kena mutarka pekara tu.

"Ba penemu aku kediri mega, aku ngasaika patut bisi silibus Sivik dalam sekula berengkah ari Form 3, Form 4 enggau Form 5, ba maya sekula suba, tang diatu nadai agi silibus nya.

"(Dalam silibus) patut madahka pasal numbuhka menua, bakani pengawa bepilih diatur, nama pengawa perintah negeri tauka perintah besai, nama pengawa kabinet enggau ke bukai. Mayuh raban nembiak enda nemu pasal tu, sida semina ngundi, lalu tu chara sekeda orang ti engka ngambi peluang becheritaka pekara ke enda betul," ku iya.

Abdul Karim madahka pekara tu maya aum media beserimbai enggau Aum Komiti Pemansang Nembiak Sarawak 2022 ti diatur ba sebuah hotel ditu, kemari.

Abdul Karim Rahman Hamzah
Abdul Karim Rahman Hamzah

Berindik ari Akta Undi 18 udah nyadi undang-undang lalu dikena berengkah 3 Januari 2022, umur pengundi diturunka ari 21 ngagai 18 taun ku iya, diatu tanggungpengawa begulai sekalika Opis Pengawa Bepilih, sereta sekalika parti ti merintah tauka parti ti nyakal, patut ngembing sida ke beumur 18 taun awakka sida ukai semina nemu mangkah.

Ku iya, nengah Akta Undi 18 nya nya enda ngira sapa ke beumur 18 taun sechara automatik nyadi pengundi enti dibandingka enggau suba, enti deka nyadi pengundi mesti ngerejista diri nyadi pengundi.

Taja pia, diatu tau enda ibuh ngerejista asal peranak menua, asalka bisi kad pengelala terus automatik deka terus masuk dalam sistem nyadi pengundi lalu endur  ngundi nya nitihka address dalam kad pengelala, ku iya.

"Ke pemadu beguna ditu mega kitai ulih meda rebak biak sida enda tentu rinduka pasal politik, sida enda kelalu rindu, tang lebuh pengawa bepilih majak semak,  sida tu tebal agi tebuka amat ngena media rama lalu tetiap iku ke beumur 18 taun bisi telefon.

"Nya alai enti kitai enda meri penerang ti manah pasal tanggungpengawa nyadi pengundi, tu deka ngujungka sida tau nerima penerang ke enda betul, laban media rama tu bisi nya betul bisi nya salah.

"Aku arap bendar sida ke megai tanggungpengawa baka SPR tauka Opis Menteri Lumba, Nembiak enggau Main tauka Opis Menteri kami meri penerang ti ukai semina minta meri sukung ngagai parti, tang lebih agi ngagai ngajar sida ambika nyadi peranak menua ti bisi tanggungpengaw, enggau ngundi nitihka utai ti dipechaya sida sapa ke patut, nentuka sapa bagi chalun ke patut nyadi chalun, ni bagi parti ke betul ulih ngiring negeri enggau menua," ku iya seraya madahka opis menteri iya deka ngatur program ke ulih meri penerang nya ngagai raban nembiak.

Abdul Karim arap bendar opis menteri iya deka bejalaika tanggungpengawa nya, ukai bekaul enggau politik tang lebih ngagai ngajar raban nembiak ke patut ngundi sereta milih perintah ti bekaul, perintah ke deka mai negeri kitai jauh agi.

Iya ke mega Menteri Dagang temuai, Industri Kreatif enggau Seni Pemerindang Sarawak dulu ari lebuh ke ngenang pasal Aum Komiti Pemansang Nembiak Sarawak 2022 madahka nya siti aum ti besai ti ngayanka pengeran deka ngemansangka nembiak.

Ku iya, aum diatur abis nadai sekali setaun alai berandauka pasal penanggul bekaul enggau nembiak kelimpah ari perambu enggau penemu pasal chara deka mutarka penanggul ti bekaul enggau nembiak.

"Ba aum ke sekali tu kami bisi beberapa keretas kereja ti bisi dibantaika nyengkaum bekaul enggau Akta Undi-18 enggau empas ngagai raban nembiak ti dibantaika Institut Pembangunan dan Kecemerlangan Kepimpinan, Opis Menteri Nembiak,Lumba enggau Main Malaysia, strategi pemansang ekonomi ungkup raban nembiak (Opis Menteri Nembiak, Lumba enggau Main Malaysia).

"Nambahka nya keretas kereja pasal strategi betapi enggau empas ari simptom 'Long COVID-19' ba raban nembiak (Opis Pengerai Negeri Sarawak), kes pengawa jai bekaul enggau raban nembiak (Polis Diraja Malaysia) enggau chara napi isu rama enggau tanggungpengawa raban nembiak Sarawak ti dibantaikaKaunsil Pemansang Sosial.

"Aum ti baka tu kitai deka nyimpul bakani kitai deka ngatur program ti mungkur raban nembiak ari baruh opis menteri. Kitai dekaka raban nembiak kitai nyadi baka ti di kedeka kitai," ku iya.

  • oleh
  • Advertisement