Anda di sini

Lima atur pengawa kena ngerichahka pengerami Hari Sarawak, 22 Julai

Advertisement

SIBU: Lima atur pengawa nyengkaum teater muzikal, belagu enggau betanda deka dikena ngerichahka pengerami Ngintu Hari Sarawak 2022 ba Stadium Tetutup Sibu kena 22 Julai berengkah ari pukul 7.30 malam.

Menteri Pemansang Orang Indu,Nembiak Mit enggau Pengelantang Komuniti Dato Sri Fatimah Abdullah madah, semua atur pengawa nya ditusun Unit Protokol, Istiadat Penusun Atur Pengawa (UPPANS) ke nyadi pengatur nya.

"Atur pengawa keterubah iya nya teater muzikal Rosli Dhobi. Teater muzikal tu nyeritaka pengidup enggau ulah Rosli Dhobi ti negika menua tu ambika ulih merdeka, ti enda kala dipecharaka.  

"Kedua iya nya mantaika lagu khas Hari Sarawak 2022. Muzik universal  enda ngira maya enggau usul. Nengah muzik nya kena ngenataika mesej pekara bekaul enggau menusia,penyanyau enggau pengelikun. Muzik mega ulih nyerakupka.

"Ke tuju nya, kami nengkebang siti lagu khas patriotik enggau tuju  kena negu asai ati rayat Sarawak sereta ngangkatka semengat sayauka Sarawak ba rayat Sarawak," ku iya madah maya aum media pengerami Ngintu Hari Sarawak 2022 ba sebuah hotel ditu, kemari.

Fatimah enggau ke bukai mandangka poster pengerami ngintu Hari Sarawak 2022.
Fatimah enggau ke bukai mandangka poster pengerami ngintu Hari Sarawak 2022.

Ku Fatimah, ketiga iya nya mandangka video khas Hari Sarawak 2022 ti diberi namal 'The Lost Kingdom of Sarawak.'

Sejarah Sarawak ku iya, ti suah disebut maya jeman Perintah  Brunei enggau Ruang Bilik Brooke merintah pengelama 100 taba perua Sarawak ti dikelala enggau nama Sarawak Kingdom.

"Tang kebendar iya bisi  lima Perintah Kuno Sarawak maya nya kelia.Perintah kuno tu iya nya Perintah Negeri Santubong, Perintah Negeri Samarahan-Sadong, Perintah Negeri Kalaka, Perintah Negeri Saribas enggau Perintah Negeri Malano.

"'The Lost Kingdom of Sarawak' iya nya pengemun gaya renggat pemansang dalam pengidup bansa Sarawak ti ditunda yentuk ke kitai ulih numbuhka perintah kediri kena 22 Julai 1963, pengudah lama ari baruh pegai perintah kolonial. Video tu deka mandangka transisyen Sarawak nuju Sarawak moden kemaya hari tu," ku iya.

Ngenang pasal atur pengawa keempat, Fatimah madahka nya nyengkaum mantaika tanda 'Thousand Hand, Thousand Hope' ti mandangka pengandal ati rayat Sarawak ngagai iring ketuai negeri.

"Atur pengawa kepenudi iya beperindang enggau artis ari negeri tu enggau artis tebilang menua," ku iya seraya madahka pengawa mandangka main bunga api deka diatur ba Dataran Tuanku Bujang.

Fatimah ke mega Kaban Kunsil Negeri Dalat madah, penyampau orang ke datai ngulu program nya nitihka kapasiti stadium, iya nya 800 iku.

"Kelimpah ari nya,raban pengatur mega deka nyendiaka skrin ba Dataran Tuanku Bujang ambika mensia mayuh ti enda ulih ngulu nya ulih meda pengerichah pengerami nya," ku iya.

Pengawa beperindang malam nya dipelabaka diatur pengelama sejam setengah ke mega dika dipancharka sechara terus nengah Facebook Unit Komunikasyen Perintah Sarawak (UKAS).

Advertisement