Enggau penyampau nya diadang ulih mantu negeri tu nyapai juluk 1.2 juta iku temuai ti ditagit nemuai ke Sarawak
“Taja pan garis entara menua udah dibuka tang pengirau ati orang deka nemuai agi bisi. Juluk kitai ba penyampau orang ke datai ngagai RWMF taun tu iya nya 12,000 iku. Kitai patut praktikal”
Dato Sri Abdul Karim Rahman Hamzah
Menteri Dagang Temuai, Industri Kreatif enggau Seni Pemerindang
Dikarang Rengenyan Labang
KUCHING: Festival Muzik Hutan Hujan Sedunia (RWMF) Ke-25 ti deka diatur ujung minggu tu, 17 ngagai 19 Jun, ulih matak urung 12,000 iku temuai tauka orang ti rinduka muzik serata dunya kelimpah ari dalam menua tu.
Menteri Dagang Temuai, Industri Kreatif enggau Seni Pemerindang Dato Sri Abdul Karim Rahman Hamzah madah, enggau penyampau 12,000 iku ti ditagit datai ngulu RWMF 2022 ,diadang ulih mantu negeri tu nyapai juluk 1.2 juta iku temuai ti ditagit nemuai ke Sarawak.
“Taja pan garis entara menua udah dibuka tang pengirau ati orang deka nemuai agi bisi. Juluk kitai ba penyampau orang ke datai ngagai RWMF taun tu iya nya 12,000 iku. Kitai patut praktikal.
“Ba RWMF sebedau tu kitai ulih nyapai lebih ari 20,000 iku temuai, nya tiga taun ke udah.
“Naka ke diatu kami mujur nyual 7,000 iti tikit, lalu penyampau tu udah manah, lebih ari ke dijangka kami,” ku iya ti mega Menteri Nembiak, Lumba enggau Main, enggau Pemansang Orang Dagang.
Abdul Karim madahka pekara nya lebuh ditanya maya aum pengarang berita nyerumba bejadi bup ‘The Rainforest World Music Festival – A Journey of 25 Years’ ti diatur ba Bilik Aum Mulu Opis Menteri Dagang Temuai, Industri Kreatif enggau Seni Pemerindng ba Begunan Baitulmakmur Sayap Baru ditu, kemari.
“Suah agi orang kitai nganti nyentuk datai ba maya ke sempil endar (baru meli tiket). Tang kitai ngarapka kitai ulih nyapai 12,000 iku temuai ke ditagit kitai (datai ngagai RWMF taun tu),” ku iya.
Nambah nya, bekaul enggau pesereta raban pemuzik RWMF 2022, iya madahka penyampau nya lebih ari tau ke udah berindik ari taun tu diatur nengah chara hibrid.
Ku iya, kelimpah ari pesereta datai sereta mandangka muzik maya RWMF ke diatur ba Kampung Budaya, bala pemuzik tauka pesereta mega bisi mantaika muzik sida nengah chara virtual.
“Pesereta taun tu enti dichampur sekali enggau sida ke merindang nengah chara visual, penyampau iya lebih ari taun ke udah, iya nya bisi 68 iku pesereta.
“Tu nyengkaum pesereta tauka pemuzik ari menua China, Korea, Australia, India, Singapura, Indonesia, ari Malaysia pemadu mayuh, Kanada, Asonia, Itali, Jepun, Madagaskar, Filipina, USA, Vietnam sereta Ukriean enggau ke bukai,” ku iya.
Nyerumba RWMF 2022, servis perengka penangkut ngena 'shuttle' mega bisi disediaka ba tiga endur iya nya Merdeka Plaza, Riverside Sayap baru enggau Pullman.
Kelimpah ari nya, ditanya bekaul enggau SOP ti dipejalaika sekumbang RWMF 2022, Abdul Karim madahka semua orang ke datai patut nyaga diri empu lalu alai ngatur festival tu mega ba kandang endur ti tebuka.
Bepelasarka SOP ku iya, enti ba kandang endur tebuka tau enda ibuh ngena sengkabung idung enggau mulut.
“Ngena sengkabung idung enggau mulut tau enda dikena maya festival tu diatur. Anang irau, sida raban ari opis pengerai nadai dia meri kompaun,” ku iya.
Nyerumba enggau RWMF mega, endur mandangka barang asil pengelandik jari enggau pemakai ku iya, kitai nguji deka ngajar sereta nelebaka temuai ti bisi tanggungpengawa nyaga pemeresi.
Bisi datai ba atur pengawa tu kemari, Sekretari Mendam Dagang Temuai, Industri Kreatif enggau Seni Pemerindang Hii Chang Kee enggau sida ke bukai.