KUCHING: Sarawak ngenulu rintai negeri di Malaysia pemadu mayuh nanam pun kayu, iya nya 12,247,202 naka 30 Mei taun 2022.
Premier Sarawak Datuk Patinggi Tan Sri Abang Johari Tun Openg madah, Sarawak nagit nanam 35 juta pun kayu manggai ba taun 2025.
Ku iya, laban Sarawak wilayah ti pemadu besai di Malaysia, negeri tu tau nyadi ketuai ba pengawa mutarka isu ubah gaya hari enggau nyaga ekosistem.
Ku iya, tu ulih dipejalaika nengah chara ngambi inisiatif kena nyemelaka pemansang enggau ngenanka rampa asal.
"Tu nyadi sukung ngagai 'Program Penghijauan Malaysia' ti nagit nanam 100 juta pu kayu manggai ba taun 2025.
"Naka 30 Mei 2022, 33,162,534 pun kayu udah ditanam di serata menua lalu Sarawak ba tangga pemadu atas, iya nya udah mujur nanam12,247,202 pun kayu.
"Aku arap amat ati penyampau tu deka nambah nengah pengawa bejadi Program Mulaika Pemanah Habitat, Ngintu, Besaup Nanam Pun Kayu 10 Taun Sarawak Energy kemari," ku iya lebuh ke bejaku maya Bejadi Program Program Mulaika Pemanah Habitat, Ngintu, Besaup Nanam Pun Kayu 10 Taun Sarawak Energy di Samajaya Nature Reserve ditu, kemari.
Ku Abang Johari, strategi pemansang Sarawak berunding sereta ngemeratka penegap rampa menua sereta komited neruska nya dalam Strategi Pemansang Pengudah COVID-19 (PCDS) 2030.
"Nya alai aku ngelalau SEB (Sarawak Energy Berhad), ambika nanam pun kayu ti mayuh meri pemanah ukai semina ngagai ekosistem, tang ngenauka kompeni tu ngasaika pengurang penyampau chukai ti dibayar ngagai perintah besai.
"Berebak enggau nya mega, SEB ulih mantu perintah negeri ambika Sarawak ngembuan stok karbon ti mayuh. Reti nya enti Sarawak nanam mayuh pun kayu, nya rau nyadi sebagi ari sektor dagang karbon," ku iya.
Ku iya baru, nemu pasal potensial dagang karbon ba pengawa ngemansangka ekonomi Sarawak, perintah negeri bedau lama udah ngubah Kanun Tanah Negeri ambika Perintah Sarawak tau nyaga ruang langit ba wilayah iya.
Ku iya, nya mega awakka Sarawak tau ngaduka pekara bekaul enggau ngenan rampa menua asal sereta ngena peluang nya ngemansutka enggau ngambi oksigen, ngambi karbon ambika ditaruh ba fasiliti ti lebih selamat.
"Karbon dioksida enggau gis rumah gadung bukai ti dipansutka ari industri mesti diambi, dipadat ke tuju dianjung lalu ditaruh ba baruh tanah tauka ba fasiliti ti lebih selamat.
"Reti nya CCUS (Carbon Capture, Utilization and Storage) deka nyadi faktor ke beguna amat dalam Strategi Pemansang Pengudah COVID-19," ku iya.
Berebak enggau nya, Abang Johari mega madahka perintah negeri setuju ngangkatmanah Piasau Nature Reserve Miri ba puak mengeri besai Miri ngena agih belanja RM30 juta.
Ku iya, nya sebagi ari pengawa ti dipejalaika Sarawak kena mulaika pemanah kandang menua ke gadung di negeri tu,kelimpah ari ngemansangka dagang karbon.
Ku iya baru perintah negeri mega meri perambu ambika Taman Bukit Siol di Petra Jaya dikemansangka nyadi Taman Rizab Rampa Menua kedua di mengeri besai tu kelimpah ari Samajaya Nature Reserve.
"Reti nya kitai deka ngemansangka Taman Rizab Rampa Asal ba Bukit Siol enggau Bukit Lima di Sibu. Aku endang deka ngangkatmanah Bukit Lima.
"Tu deka dipejalaika nengah kerejasama enggau Universiti Teknologi Sarawak (UTS) sereta SFC (Sarawak Forestry Corporation).
"Aku mega deka ngaga pemansang baru ba pasar Sibu kelebih agi di Bukit Assek. Tu kena ngeranchakka baru pemansang di menua nya nengah chara ngemaruka pasar nyengkaum ba (sitak) Pelawan terus ke Bukit Lima," ku iya.
Ku iya, diatu pengawa ngemansangka baru Sibu mengkang ba renggat mansik laban nya pekara ke beguna amat ngemansangka bagi menua nya.
Ba pengerami nya, Abang Johari mega bisi ngemataka pengawa nyain memorandum pemereti ati (MoU) entara SEB enggau SFC ungkup kerejasama nanam enggau ngintu pun kayu kelimpah ari bejalaika sekeda projek mansik bekaul engagu biodiversiti ba endur projek, aset enggau fasiliti SEB di negeri tu.
Sama bisi ngulu pengerami nya kemari, Menteri Utiliti enggau Telekomunikasyen Datuk Julaihi Narawi, Sapit Menteri Utiliti enggau Telekomunikasyen Datuk Dr Abdul Rahman Junaidi, Sapit Menteri Pemansang Mengeri enggau Rampa Menua Datu Len Talif Salleh, Chairman SEB Datuk Amar Hamed Sepawi, Ketuai Pemesai Eksekutif SEB Datu Sarbini Suhaili enggau Ketuai Pemesai Eksekutif SFC Zolkipli Mohamad Aton.