KUCHING: Pengerami Gawai Dayak Negeri deka diatur baru taun pengudah diketuka pengelama dua taun, lalu taun tu gintir komuniti Orang Ulu deka nyadi tuai pengatur.
Chairman Komiti Kereja Pengerami Ngintu Gawai Dayak 2022, Dato Gerawat Gala madahka ungkup pengerami taun tu, bisi dua batang program iya nya Makai Lemai Gawai Dayak Renggat Negeri enggau Gawai Dayak Bazaar.
Berambaika leka jaku 'Segulai Sejalai', pengerami makai lemai nya deka diatur kena 25 Jun ba Palan Konvensyen Borneo Kuching (BCCK) ke deka digulu Tuai Megai Menua (TYT) Tun Pehin Sri Abdul Taib Mahmud enggau bini iya Toh Puan Datuk Patinggi Ragad Kurdi Taib.
Sama deka ngulu pengerami nya, Premier Sarawak Datuk Patinggi Tan Sri Abang Johari Tun Openg enggau bini iya Datuk Amar Juma'ani Tuanku Bujang enggau urung 2,000 iku temuai bukai.
"Malam nya mega deka mantaika 'ratu cantik' nyengkaum mantaika khas pemenang Miss Universe 2020 Francisca Luhong James, pesereta Miss World Malaysia 2019 ari Sarawak Juliana Sambai Sibat enggau Mr Tourism World 2017 Joshua Lennet.
"Sama bisi enggau ba pengawa nya ila iya nya Kumang/Dayung Sangon/Keligit Gawai 2022 ti diatur ba mayuh bengkah bagi menua ti diarika empat iku pengari ti dipilih ari tetiap komuniti.
"Kena nyempulang bala indu bajik tu, enam iku bujang (dua ari tetiap komuniti ti menang Keling/Dali Pagon/Belawan Gawai 2022)," ku iya madah maya aum media berkaul enggau pengerami nya ti diatur ba Bilik Komiti Kunsil Negeri (DUN), kemari.
Bekaul enggau Gawai Dayak Bazaar 2022, nya deka berengkah ari 17 nyentuk 26 Jun tu ba laman Dewan Mensia Mayuh Majlis Bandaraya Kuching Selatan (MBKS).
Mayuh bengkah aktiviti deka diatur sekumbang bazaar nya dibuka berengkah ari pukul 4 lemai ari Hari 1 nyentuk Hari Lima lalu pukul 10 pagi nyentuk pukul 11 malam maya ujung minggu.
Antara aktiviti ke bisi diatur iya nya Malam Senian Raban Bansa Dayak-Orang Ulu, Iban enggau Bidayuh, pemerindang live band, pekit Kumang enggau Keling (9 nyentuk 15 taun), Gawai Idol sereta beperindang enggau artis nemua tu.
Kelimpah ari nya, pengatur mega nagit muka 200 bansal bejualka pemakai, ai irup enggau asil p engelan dik jari skena ngerichahka agi bazaar nya.
Gawai Dayak Bazaar deka dilancharka Sapit Premier Sarawak Datuk Amar Douglas Uggah Embas 20 Jun tu, urung pukul 7 malam.
Orang ke bisi ati enggau bejual ba bazaar nya tau betelefon ngagai Bobby Kinang (019-8382015) ungkup bansal nyual pemakai enggau ai irup, lalu Dennis Lang (014-8850626) ungkup bansal nyual asil pengelandik jari.
Berebak enggau nya, Gerawat ngarika komiti pengatur meri terima kasih ngagai Perintah Sarawak laban udah meri geran RM600,000 kena ngemujurka pengerami nya.
Kena nambahka nya, komiti pengatur mega bisi nerima bantu ari Opis Menteri Dagang Temuai, Seni enggau Budaya Malaysia sereta Menteri Dagang, Industri Kreatif enggau Seni Pemerindang Sarawak.