KUCHING: Rayat patut ngemeranka gaya idup ti bepengerai kelimpah ari ngenanka pengerai setipak enggau enggau pengawa perintah nempa Sarawak nyadi negeri maju bepenatai pemisi besai manggai ba taun 2030.
Sapit Premier Dato Sri Dr Sim Kui Hian madah,rayat mesti berengkah nyaga pengerai kena nyeliahka sebarang penyakit ba maya Sarawak majak ngerembai maju.
"Taja pan perintah Sarawak deka majak nyendiaka perengkaguna pengerai ungkup rayat, tang kami dekaka sida seruran gerai. Batang tuju kami iya nya deka meda semua rayat bisi pengidup ke meruan baikka maya bekereja tau maya udah pinchin.Tu awakka sida ulih ngasaika kualiti idup ti pemadu manah," ku iya.
Iya bejaku munyi nya lebuh dirandau media pengudah bejadi Karnival Kesihatan Komuniti Sihat Pembina Negara (KOSPEN) WOW ba Auditorium Palan Pansik Klinikal (CRC), Sepital Besai Sarawak (HUS) ditu, kemari. Sama bisi maya nya, Sapit Direktor HUS, Dr Hayati Jaafar.
Dulu ari nya, Dr Sim lebuh ke bejaku madah,Penyakit Enda Berampit (NCD) kelebih agi kardiovaskular, riman enggau diabetes udah nyadi batang kebuah nabanka tau nyawa di menua tu nyengkaum di Sarawak.
Ku iya, nya udah ngujungka urung semilan juta pemati ba orang lelaki enggau orang indu ke ari baruh umur 60 taun.
"Nitihka Ripot Status Global NCD 2014, data mandangka NCD udah ngujungka 68 peratus batang kebuah pemati di serata dunya dalam taun 2012. Ari penyampau tu, menua ngerikodka 80 peratus penyampau pemati ketegal NCD," ku iya seraya madahka pekara nya aamat ngirauka ati sereta patut diputarka.
Nya alai, iya ngarapka nengah program KOSPEN WOW nya ulih meri penyedar pasal pemesai guna nyaga pengerai enggau gaya idup ke bepengerai ba rayat nyengkaum pengereja pengawa perintah.
"Tu setipak enggau juluk ati perintah deka ngemujurka 'Agenda Nasional Malaysia Sihat' ti ngembuan juluk deka nerenak gaya pengidup ke bepengerai enggau penegap rampa menua kena nyukung pengelantang pengerai," ku Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua.
Mayuh bengkah program pengerai disediaka sekumbang karnival KOSPEN WOW ti diatur berengkah ari 13 Jun nyentuk 1 Julai 2022.