Berindik ari ti bisi pupu raban bansa di nengeri tu kelimpah ari ngemeranka runding ti seruran bebasaka pangan diri
"Idup kitai mesti nyapai penyerakup baru mih ulih ngemansangka sitak diri empu. Tu endang pekara ti berat,"
Dato Sri Tiong King Sing
Presiden PDP
SIBU: Pengerami ngintu Hari Gawai Dayak nyadi pelasar dalam ngenegapka runding ti ulih bebatak asur komuniti pupu raban bansa sereta jalai pengarap di Sarawak.
Presiden Parti Demokratik Prograsif (PDP) Dato Sri Tiong King Sing madah, pengerami ngintu Hari Gawai tu iya nya medium dalam ngenegapka kaul semua bansa ti bisi di Sarawak.
"Kena ke malam tu udah ngerikodka sejarah, enda kala PDP enggau Parti Pesaka Bumiputera Bersatu (PBB) begulai ngatur program Gawai ti bansa tu.
"Tu nyata udah ngayanka kitai PDP enggau PBB bekerejasama nyadi sebuah ruang bilik dalam Gabungan Parti Sarawak (GPS)," ku iya nerang maya ti bejaku dalam Pengerami Ngintu Hari Gawai Dayak 2022 ti diatur begulai entara PDP N.53 Bawang Assan enggau PBB Zon Tengah di sebuah hotel tebilang ditu kena malam Hari Enam nyin tadi.
Sama bisi datai iya nya SApit Menteri Pelajar, Inovasyen enggau Pemansang Pengelandik Dr Annuar Rapaee, Sapit Menteri di Opis Premier Sarawak (Undang-Undang enggau Adat Bumiputera) Jafferson Jamit Unyat, Kaban Kunsil Nengeri (ADUN) Daro Shafiee Ahmad, ADUN Katibas Lidam Assan, Sekretari Politik Premier Sarawak Romeo Chirstopher Tegong, Chairman PDP N.53 Bawang Assan Wong Hua, chairman komiti pengatur Kunsilor Joshua Ting sereta temuai dipebasa ke bukai.
Nitih ku iya ti mega ADUN Dudong, pengawa ngatur program tu mega dikena ngayanka semua rayat di Sarawak sama bebasaka raban bansa bukai, adat enggau bansa.
"Idup kitai mesti nyapai penyerakup baru mih ulih ngemansangka sitak diri empu. Tu endang pekara ti berat," ku Kaban Parlimen BIntulu nya nyemetak.
Iya ngarapka, ulih ngatur pengerami ti bansa nya enggau besai agi maya taun ti deka datai ila.
Tiong ti mega Duta Khas Menteri Besai ke Republik CHina udah besetuju semua tuai rumah (TR) di sitak Kunsil Nengeri (DUN) Bawang Assan dichiri baru lalu deka diberika sepikit.
Kebuah pia, ku iya nerang, mayuh entara bala TR nya udah abis timpuh megai tanggungpengawa tauka servis.
"Aku minta sukung ari Dr Annuar ngambika berundingka pengawa nyiri baru TR nya ke lalu diberi setipikit nyiri," ku iya nambah.