SRI AMAN: Ex Kepala Pengajar Sekula Primari (SK) Selepong sereta mega ex Kunsilor Menjang Niah udah dichiri nyadi Penghulu bedau lama ti udah.
Menjang, 67, mega kala megai tanggungpengawa nyadi Pemesai ba Unit Teknologi Pelajar ba Opis Pelajar Sri Aman.
Entara sida ke bisi datai ngulu pengerami makai selamat Menjang ti udah dichiri nyadi Penghulu ke diatur ba Rumah Maureen, Kara Atas di Lachau iya nya Kaban Kunsil Nengeri (ADUN) Bukit Begunan Datuk Mong Dagang ti mega mandal presiden Parti Rayat Sarawak (PRS).
Dalam jaku pengelalu iya, Mong madahka Pantu endang begunaka ketuai komuniti ba tikas Penghulu laban kandang menua tu diatu udah nyadi Pelilih Menua.
Pantu udah betukar ari Pelilih Menua Mit ngagai Pelilih Menua kenyau ari Disember ti udah ditukuka Premier Sarawak Datuk Patinggi Tan Sri Abang johari Tun Openg ba sebuah pengerami ti daitur kena 14 Disember 2021.
“Sitak Pantu tu endang patut udah bisi Penghulu laban ti udah ditukar ngagai Pelilih Menua,” ku Mong seraya nambah madahka Langgong Wasam iya nya Pemesai Pelilih Menua Pantu ti keterubah.
“Seabak mega enggau pengari rayat (YB), Penghulu mega orang ti sigi dipandang kitai. Nya alai bala bini enggau anak iya mega patut sama nyaga diri ba mua mensia mayuh lalu nyaga manah ulah sida laban sida enda tau ngenyaika nama YB sereta mega ketuai komuniti baka Penghulu,” ku iya.
“Tanggungpengawa Penghulu tu chukup besai. Pia mega bini enggau anak iya sama kebendar nya nyadi 'Penghulu',” kku ya nyemetak.
Beserimbai enggau tu, dalam jaku pengelalu iya, Menjang meri besai terima kasih ngagai perintah sereta mega PRS laban ti udah pechayaka iya.
Kelimpah ari nya, pengerami makai selamat tu mega iya nya beserimbai enggau ngintu pengerami Hari Gawai Dayak rumah panjai tu. Lalu sama mega pengerami tu dikena ngelai 44 taun Menjang enggau bini iya Ranti Awel ti udah nirika rumah tangga sereta bisi mega program nyuaka setipikit nyiri tuai rumah baru ungkup lima buah rumah panjai di sitak nya.
Ku Mong madah, pemansang pengelantang pendiau ba tikas rumah panjai mayuh bepanggai ngagai pengulih enggau kulaiti tuai ruamh sida bejalaika pengawa.
Iya madahka chara ti pemadu manah nentuka semua tu iya nya tuai rumah enggua nembiak redak terus sama nyukung perintah diatu.
Berindik ari nya mega iya bisi mantaika pengasa ati diri ngagai sekeda tuai rumah ti madahka diri enda nykung perintah ke udah bebendar mantu sida.
“Endang nyadi siti pekara demokrasi ngagai tuai rumah tu deka milih tauka nyukung sebarang bagi parti tang diatu nadai bisi dikumbai 100 peratus demokrasi ti dipraktikka. Lalu pengujungnya pegelantang pendiau rayat bepanggai tegauh ngagai pengawa ti digaga tuai rumah sida,” ku iya nyemetak.
Mong ngarapka tuai rumah ulih terus nyadi mata enggau pending perintah sereta nyadi jmatan entara sida tu enggau ejensi perintah.
Iya madahka tuai rumah enda tau puntan ngiring enggau ngembing pekara administrasyen lalu mesti datai nyukung sebarang pengerami tauka program rasmi laban tu endang nyadi tanggungpengawa sida.
“Anang ngena kebuha nadai ari laban tu udah nyadi tanggungpengawa kita. Pia mega perintah tu bepanggai ngagai kita,” ku iya.
Senentang pekara bukai, Mong meransang ngambika peranak di sitak dipegai iya ngaga peminta ari sukut belanja ngagai perintah ungkup ngaga jalai ke kebun laban perintah endang bisi ngungkupka agih belanja ke progam tu.
Kelimpah ari Langgong, sida bukai ti bisi datai iya nya Sekretari Opis Kaunsil Sri Aman (MDSA) Tay Guan Hing sereta Pemesai Khas Mong, Whelton Lumpoi.