Anda di sini

Jalai Kuching-Bau deka diangkatmanah enggau ungkus RM100 juta ngagai jalai alun begembar dua

Advertisement
Abang Johari begulai enggau Henry sereta temuai dipebasa ke bukai lebuh ti ngemunka Projek Palan Main Asal Bidayuh. - Gambar Roystein Emmor
Abang Johari begulai enggau Henry sereta temuai dipebasa ke bukai lebuh ti ngemunka Projek Palan Main Asal Bidayuh. - Gambar Roystein Emmor

BAU: Jalai alun ti nyambungka Kuching ke Bau diatu deka diangkatmanah ngagai jalai alun begembar dua ti ngena ungkus sepenyampau RM100 juta.

Premier Sarawak Datuk Patinggi Tan Sri Abang Johari Tun Openg madah, nya digaga dikena ngangkatka kaul entara kededua kandang menua nya.

Maya ti nyadi Menteri Dagang Temuai suba, ku iya madahka diri udah mansik kandang menua Bau laban ti ngembuan potensial dagang temuai ti ngembuan pengeraja main asal lalu tu ti ngayanka guna patut bisi disediaka jalai alun ti manah.

"SAmbung jalai ti pemadu baru ke Kuching iya nya Jalai Besai Pan Borneo enggau jalai lama bukai ari Kuching ke Bau ke alai jalai tu iya nya arteri ke Bau ari Kuching nengah Siniawan.

"Nya alai, jalai ke Bau mesti bisi akses ke manah lalu kitai deka ngangkatmanah jalai ngagai jalai begembar dua baka Jalai Besai Pan Borneo ari simpang di Kuching ke Bau," ku iya lebuh ti datai ngulu pengerami Nyambut Pengabang Bau Gawai 2022 di Dewan Suarah Bau, ditu kemari.

Abang Johari madahka guna dikena ngangkatmanah infrastruktur iya nya setipak enggau Strategi Pemansang Pengudah COVID-19 (PCDS) 2030 lalu meri akses ke manah agi ngagai rayat.

"Ungkus projek tu RM98 juta, nyau deka RM100 juta, nyengkaum infrastruktur bukai, tambah-buai, aku ngira urung RM200 juta.

"Nya alai, kitai deka bejalaika pemansang tu lalu tu reti nya Bau deka bisi kaul enggau Lundu enggau Sematan," ku iya.

Beserimbai enggau nya, Sapit Menteri Perengka Pengangkut II Dato Henry Harry Jinep madah, projek tu iya nya ari dua renggat.

Ku iya, renggat keterubah ngaul 5.1 kilometer deka dipejalaika dalam timpuh ti enda lama agi iya nya kena bulan Ogos.

"Kitai enggai Bau tinggal. Nya alai kitai dekaka Bau ditambah manah rentayan jalai alun ari Pan Borneo, Kuching, Lundu enggau ke Bau. Nya mih kebuah kitai begunaka jalai alun begembar dua dikena nangkup perengka pengangkut ti nambah sereta mega penguna pan majak mayuh," ku iya.

Ba pengerami ti sama, Abang Johari udah ngemunka Palan Main Asal Bidayuh ti benung digaga ngena ungkus agih belanja RM8 juta ari perintah nengeri.

Henry ti mega Kaban Kunsil Nengeri (ADUN) Tasik Biru madahka projek nya udah lama dipejalaika ari komuniti Bau Bidayuh ti dipegai Gerempung Nasional Dayak Bidayuh (DBNA) pampang Bau.

Advertisement